يوميات حب ( عمر - ساره )

**قلبى مغمى عليه** · 10-08-2009, 07:09 PM

السلام عليكم ورحمة الله وبركاته

م النهارده هنبدأ قصه حلوه يارب تعجبكم

ابطالها همه عمر وساره

وهيه هتحكى عن حبهم من يوم ماعرفو بعض لحد ماتجوزو

يلا عايز الكل يتابع الحلقات وتقولولى رايكم بجد

ويارب تعجبكم

نبدأ على طول الحلقة الاولى

ساره :

كلما تحدثت أمى عن زواج أحد الأقارب أو القريبات وعن الجهاز الكبير الى شفته فى بيتهم الجديد تثور ثائرتى وأصاب بالحموضة من شدة الغيظ
فوالدى أصر على توفير نص مرتبى علشان الزوج الى ممكن يجى وممكن ميجيش .

بس انا مالى بكل ده؟ عايزين يجوزونى يدفعوا هما مش انا ويسيبونى اتصرف فى مرتبى زى ماأنا عايزه

أنا مثلا عايزه أوفر فلوس عشان أشترى سيارة خلال خمس سنوات
وكمان عايزه اكمل دراساتي العليا
ليه عايزين يخدو منى المرتب غصبا واقتدارا
ثم مين ده الى يستحق اتحرم من نص مرتبى بسببه حاجه تغيظ
أنا مش هصرف قرشا على واحد معرفوش يدخل فى حياتى فجأة متوقع انى هكون خادمته المطيعه

"بلا جواز بلا نيلة "

عمر :

اختى بتحسدنى عشان انا رجل اقدر أختار لنفسى وأقرر أمتى اتجوز ، فى حين انها بنت ومضطره تنتظر الفارس المنتظر ومفيش بيدها حيله

بس هيه للأسف مش مدركة العبء الى عليا وانا بفكر فى الجواز
انا بحلم امسك أيد بنت هى مراتى ونتمشى على الكورنيش وتاكل ترمس الى هيزود انتفاخ بطنها المنتفخ من الحمل

بس هجيب فلوس منين اى خطوبة عايزه الشىء الفلانى
وكمان انا مش عايز اى بنت ازاى أعرف ان البنت دى هتريحنى فى حياتى لانى عارف رغم سنى الصغير ان بعد ايام بسيطه من الجواز مش هحتاج غير الزوجة الطيبه المريحه فى كلامها وخفة دمها ، أنا اعرف اصحاب ليا اتجوزو وكانو بيتصلو بالشله بعد اسبوع من الفرح لانهم حسو بالملل وهمه لسه فى البدايه امال بعد سنه ولا اتنين هيعملو ايه
"بلا جواز بلا نيلة "

ساره :

من اسبوع لمحت ليا أمى بأن وحده من اصحابها عندها ابن اكبر منى بتلت سنين بيشتغل مهندس كمبيوتر فى شركة خاصة وهيه عارفه انه شاب مؤدب وشكله حلو وهيزورنا هو وأهله يشربوا معانا الشاى يوم الخميس الجاى .

كنت فكره انى هضايق ومش هرضى بموضوع العريس ده عشان انا عايزه ابنى مستقبلى الاول بس معرفش ايه الى سكتنى ؟ يمكن فضول اى بنت اتقدملها عريس ؟؟؟؟؟؟؟؟؟

اتصلت بصحبتى الانتيم ولما حكتلها ضحكت ودعتلى بالتوفيق واكدت عليا انى اصلى صلاة الاستخارة وأول ماقفلت معاها صليت وفضلت قلقانة طول الاسبوع من ان العريس ممكن ميعجبنيش واضطر اتجوزه واعيش حالة مأساويه وحسيت انى نكديه قوى ومعيشه نفسى فى رعب على الفاضى وجيه يوم الخميس المنتظر ............. وربنا يستر .

عمر:

من شهر امى قالتلى عن وحده صحبتها فى الشغل عندها بنت اصغر منى بتلت سنين وانها بتشتغل فى شركة ووالدها راجل محترم .
فقلتلها ياامى انتى عارفه انا مش معايا حاليا يكفى مصاريف الجواز وان كله الى حوشته من شغلى همه سبعة الاف جنيه
طمنتينى امى وقالتلى ان والدى هيساعدنى وان دى سنة الحياه وان ممكن أتجوز واعيش معاهم فى الشقه
بس انا مش عايز اعيش فى بيت ولدى
بس امى كان عندها الحل انى اخد شقه ايجار جديد
وبصراحه بينى وبين نفسى كان نفسى اتجوز واستقر بقى وتوكلت على الله وصليت صلاة استخارة
واتفقنا اننا نروح نزور العروسه فى بيت أهلها يوم الخميس الجاى وكنت هموت من القلق ، وجه يوم الخميس المنتظر .............. ربنا يستر

**************************

**قلبى مغمى عليه** · 10-09-2009, 04:28 PM

الحلقة التانية

سارة :

الخميس المنتظر قد حان وتوترى ذاد عن حده بمراحل ولو أنه يعنى توتر بسعادة
هيه مش سعاه بالظبط يعنى بس متحمسة للموقف وأهو على رأى نبيله السيد " عريييييييس يا امااااااااااااااااااى "

انا مش بحب أستعمل ماكياج بس فكرت اليوم ده انى أحط ، بس غيرت رأى لازم يشوفنى زى ماأنا ولو مكنتش عاجبه يبقى أنا خسارة فيه ،، بس انا عملت شوية ماسكات لبشرتى من باب رفع معنوياتى مش أكتر .

اتكلمت مع صحبتى الأنتيم فى التليفون وفضلت تنصحنى اعمل ايه لما يجى العريس وأهله زى مثلا انى أدخل وعينى على السجادة وانى لازم أكون مكسوفه وأقعد على طرف الكرسى منجعصش زى مابعمل دايما وكل أما تقولى حاجه اضحك عليها وأقولها أكيد هعمل العكس عشان العريس لازم يعرفنى زى ماانا من غير تزويق

فضلت اتكلم مع صاحبتى كل شويه والغريب انى ولدتى مأنبتنيش على انشغال التليفون زى كل مره شكلها حاسة بقلقى "ربنا يخليكى ياماما "

جيه وقت الغدا ومقدرتش أكل من كتر القلق، حاولت اكون طبيعية بس معدتى فضحتنى لما حسيت بالحموضة وفضلت اشرب سفن أب
وأشتم نفسى فى سرى

الساعة بقت سابعة ونص يعنى باقى نص ساعه بس على لقاء العريس المنتظر " ربنا يستر "

عمر:

الخميس المنتظر جيه بسرعة وبصراحة كنت عايز أشوف العروسة الى قالتلى عليها امى كنت بسأل نفسى ياترى هرتحلها أول اما اشوفها ياترى جميلة ولا وحشة، هيكون دمها خفيف ولا رخمة ممكن تعجبنى وأنا معجبهاش ؟ اعصابى مشدودة جدا ومش عارف أربط الكرافتة يووووووووه ايه الى انا فيه ده

دخل عليا بابا حجرتى وربطلى الكرافتة وشوفت الدموع بتلمع فى عينه فقلتله "أيه يابو عمر ده أنا لسه رايح أتقدم مش رايح أكتب كتاب ولا اتجوز " رد عليا بأنه مش مصدق أن ربنا أكرمه ومد فى عمره وشاف ابنه البكرى رايح يخطب وانى اكيد فى يوم من الايام هحس بالاحساس ده لما أروح مع ابنى عشان اخطبله

فضلت اضحك بابا عمال يتكلم على أبنى وانا حتى لسه مشفتش العروسه ، بس بصراحه الكلام مع بابا خفف عليا قلقى شويه
وعرفت اكمل لبس البدلة .

نزلنا من البيت وانا الى سوقت عربية بابا وشغلت شريط لأم كلثوم عشان بابا يسمعها وتلهيه هوه وماما انهم يتكلمو معايا لانى مكنتش عارف اتكلم خاااااالص
" ربنا يستر "

سارة :
جرس الباب
ترررررررررررن
( من جوه البيت )
" أنا مش عايزة اشوف عرسان ........ ودخلت أوضتى "

عمر :

(من بره البيت )
" يارب الارض تنشق وتبلعنى ......... أنا ايه اللى خلانى افكر فى الجواز ؟ "

سارة :

دخل عمر مطأطأ رأسه وسلم على حماه وحماته المستقبل وشويه ودخلت أنا

دخلت الصالون وعينى على السجادة وحاولت أجمع كل شجاعتى عشان أكون طبيعيه بس كنت فى أسوأ حالات الكسوف .
لمحت لون بدلته البيج وجزمته البنى ووووو وسلمت على والده وولدته ورفعت عينى عشان أسلم عليه ووووووووووووشفته .

اول حاجة لفتت نظرى عينيه وضحكته وشكلة كان غارق فى الكسوف زى
عينيه كانت صافيه وكان مش عارف يبص فين لدرجة انى افتكرته أحول وكنت هضحك بس فجأه وشى احمر و.......
وكان حلو قوى حتى وهوه مكسوف فضحكت وقعدت ولقيته بيقول حاجه بس مفهمتش، شكله كان بيبلع ريقه ومد ايده وشرب العصير .

عمر :

قعدت على كرسى لوحدى فى الصالون ، وبابا وماما قعدو على الكنبة ، وقعد والد العروسه على الكرسى الى قدام بابا وماماتها راحت عشان تنادى العروسه
واخيرا شفتهاااااااااااااا وكانت جميلة

زى مااكون شفتها قبل كده وأعرفها وبصراحه قلق الاسبوع كله راااح وانشرح قلبى ليها ، مش هقدر اقول حب من أول نظرة بس حاجه جوايا قالت هيه دى البنت الى هعيش معاها بقيت عمرى ومش ممكن اسيبها لغيرى أبدا

مقدرتش امنع نفسى اول ما شفتها انى اقول الحمد لله بس لما بصتلها حسيت انها عايزه تضحك والضحكه هتطلع من بين شفيفها فقلقت تانى
ممكن يكون فيا حاجه تضحك
بس لاء خلاص اهى ضحكت تانى وقعدت
قلت الحمد لله تانى وأخدت كاس العصير " ريقى نشف "

***********************

ركزوا بقا فى اللى جاى

**احمدجودة** · 10-09-2009, 05:41 PM

يشرفني اني اكون اول واحد يرد علي الموضوع

و متابع باهتمام

**lover 4 ever** · 10-09-2009, 05:56 PM

بجد رائع تسلم ايدك

فى انتظار باقى القصه بفارغ الصبر

**قلبى مغمى عليه** · 10-09-2009, 06:16 PM

احمد جوده يشرفنى اوى انك دخات مجرد دخول للموضوع حتى من غير ما ترد عليه

ويشرفنى اكتر اهتمامك

lover 4 ever الله يسلمك

والحلقه التالته فى الطريق اهوه

**قلبى مغمى عليه** · 10-09-2009, 06:21 PM

الحلقة الثالثة

سارة:

بدأ والدى بالكلام مع عمر عن شغله وعن الشركة الى بيشتغل فيها وواضح ان بابا كان يعرف حد من المهندسين بيشتغل فى الشركة دى كان زميلة فى الدراسة ووصى عمر انه يوصلة السلام ويفكره بصديقة القديم

وتحدث حمايا مع ولدى عن وضع الشركات القطاع الخاص ، أما طنط "حماتى" بدأت تكلمنى عن شغلى ولاحظت أن عمر عمال يبص عليا كل شويه
وبجاحه منى غير مسبقه بصيتله فى عينه مباشرة وهوه بيبصلى بس للأسف مقدرش يتكلم ولا كلمة وأظاهر انه اتفاجىء بموقفى ده بس ربنا بيحبه
فى نفس الوقت بابا سأله عن حاجه فى الشغل فبدا يتكلم معاه .

عمر:

حاولت افتح اى موضوع مع ساره بس عقلى وقف ولسانى اتعقد ولقيت ان ماما عماله تتكلم معاها وانا مش عارف انطق ولا كلمه ، فضلت ابص لسارة كل شويه ،نص عقلى مع عمى وبابا والنص التانى مع سارة كان ليها ضحكة جميله كمان ملامحها حلوه ورقيقه قوى "يابختك ياواد ياعمر " وفجأه لقيت عينيها فى عنيا ظبطتنى وانا ببصلها حاولت اتكلم وأبدا معاها اى كلام بس الكلام مخرجش من فمى

حسيت انى شكلى وحش قوى بس الحمد لله عمى انقذنى من الموقف ده وسالنى سؤال عن شغلى وواضح كمان أنها اتكسفت من الموقف لانى شفت وشها أحمر من الكسوف .

سارة :

أظاهر ان والدة عمر كانت عايزه تجره للكلام فقالتله "دي سارة طلعت بتقرا الجرنال اللي طالع جديد وعاجبك يا عمر، بس ماجابتش العدد بتاع الأسبوع ده، ماتقول لها كان مكتوب فيه إيه.."

بصتله يمكن يتكلم وفعلا فتحه فمه وسألنى أنا متابعة مقالات مين فى الجريدة ، فقلتلة وبدأنا كلامنا سوا اخيرا وأكتشفت انه رغاى لانه فضل يقولى على تفاصيل التفاصيل ويعلق ويسألنى عن راي وبعدين يفتكر حاجه نسى يقولها وووو
وانتهزت الفرصه وبدأت ابص على شكله بالتفصيل ,
كان رفيع ومتوسط الطول عجبنى شكل ايديه كانت زى ايد عازف بيانو صوابع طويلة وأظافر قصيرة ، كانت رموشه طويلة وعينيه عسلية سحرتنى واتكسفت قوى وأنا ببصلهم واتمنيت انه يكون من نصيبى
وبدات اتكلم معاه ..................

عمر:

عطفت عليا أمى اخيرا ورمتلى بطرف الحديث مع سارة سألتنى عن جرنال بحب أقراه وسارة كمان بتقراه وانها مقرتش العدد الاخير ،
فانتهزت الفرصه وفضلت احكيلها عن المقالات وكل حاجة بفتكرها،
وكانت فرصه حلوه عشان ابصلها براحتى

كل حاجه فيها كانت جميلة صوتها ، ايديها الصغيرة ، عينيها الحالمة الحنونه ، وتعليقاتها الى تضحك
وبصراحه فوق كل ده كمان كانت دمااااااااااغ

كان حوارنا بعيد خالص عن الرومانسية بس نص العمى ولا العمى كلة
على الاقل انحلت عقدة لسانى

سارة :
كانت القاعدة مجردة جلسة تعارف وعمى وبابا كانو انسجمو جدا مع بعض
بصيلى عمر وهو خارج وقالى بصوت هادىء ورقيق فضل يرن فى ودانى
" اشوفك قريب يا سارة "

عمر:

نزلت أصفر وأغني وركبت السيارة وأنا في قمة النشوة..
سألتني أمي عن رأيي,
قالها بابا سيبيله فرصه يفكر ويصلى استخارة
أما انا مردتش بس عند اول بياع جرايد نزلت اشتريت عددين من الجرنال الى هنقراها انا وسارة ان شاء الله ...........

**************************