ثلاثي اضواء مزيكا وحوارات نجوم مزيكا مع الثلاثي ..انتظرونا مع نجم جديد من نجوم مزيكا

[نور & نودة]

ثلاثي اضواء مزيكا وحوارات نجوم مزيكا مع الثلاثي ..انتظرونا مع نجم جديد من نجوم مزيكا

الموضوع ومافيه يا بنات وشباب مزيكا ان قررنا احنا الثلاثي بيكي وجلومنج ونور &نودة نعمل تيم مشترك


وكل اسبوع حانختار بالاجماع شخصية من المنتدى نسلط عليها الضوء معنا وتكون نجم الاسبوع
الشخصية المختارة ستصلها رسالة عالخاص وعند الموافقة سيتم ارسال الاسئلة ولما الاجوبة توصل حانسقها في الموضوع

وفي هذا الركن نسلط الضوء على كل من ساعد في بناء مزيكا لكل من ساهم بالخير لكل درة في بحر مزيكا لكل من يجهل هؤلاء النجوم نجوم بنوا وخطوا اساميهم في صفحات مزيكا سواء كاتبين او مشاركين لكل من له بصمة ساطعة كالشمس
لولاهم ماكانت مزيكا علت وارتقت لولاهم ماكانت مزيكا نهضت ومن هنا نسلط عليهم الاضوء ونشكرهم ونكرمهم
كثير منهم نعرفهم وكرمناهم كثيرا وكثير منهم لم يذكر احدا اسمهم بل انهم كرموا الاخرين ونسوا انفسهم فمن هنا نذكر الجميع بفضلهم وانجازاتهم ونعرفهم الى الجميع
وانتظروا اول نجم واول حوار معه

للمزيد من مواضيعي

 

[نور & نودة]

بطل الاضواء لهذا الاسبوع الاول هوا نجم قائم ومخلل ومشش في مزيكا من زمان وجوده في اي مكان في المنتدى يبعث على الجميع السرور والضحك بطل اخر روقان اخر مزاج في كل حاجة اخر ماعادة موقع وسط وحيد يحتله وسط البنات بحظوره الخفيف وخفة دمه واحترامه طيب جدا جدع وابن بلد صاحب صاحبه
انه النجم البطل الشاعر اللي مابيرحمش الكلمات والتعبيرات
محمد الدقاق

ميدو طبعا الكل عارفك في مزيكا بس عرف نفسك وبطاقتك تاني لللي مايعرفش وده موش ممكن اصدقه

1- ميلاد مزيكا كان على ايدك انتا وميزو فكيف استقبلت المولود وكيف ربيته وكبرته ؟

يــاه .. دي كانت ذكريات جامده .. مزيكا تو داي اول ما اتعمل مكانش فيه حد غيري انا و ميزو .. كنا بنشتغل فيه سوا .. كنا بنكتب و بنرد على بعض .. و بعد كدا دخل كاميلو حبيبي و رانيا طبعا ..
هو اصلا فكرة المنتدي ان انا و ميزو كنا بندخل شات وكنا مشاغبين جدا .. و كنا على طول بننطرد .. فـ ميزو قال اهو نعمل منتدي و كدا يلمنا .. والحمدلله اشتغل زي الفل .

2- لما نقول ميدو يبقى فورا نقرنه بالشعر والادب ماذا يمثلان لك وما اهميتهما بالنسبالك ؟

مش للدرجه دي يعني .. انا يمكن الى حببني فى الشعر اتنين اصحابي .. دانا و ريري .. اصحابي الانتيخ من زمااان جدا .. احنا شله بقالنا سبع سنين .. هما الى حببوني فيه و بدأت اكتب عشان اقلدهم .. بس بجد هما اساتذه ملهمش حل ..

هو الموضوع دا لحد دلوقتي لسا واخده كـهوايه .. يعني مش حاطط أمل كبير أني انشر حاجه او ان حاجه تتشهر ليا .. لأن انا كنت اعرف ناس كتير احسن مني بكتيــر و محصلش نصيب انهم ينشرو حاجه .. منهم واحد معروف جدا ع المنتديات باسم مغرم خيال .. محمد أمين .. دا كان استاذي بجد و اول واحد علمني ازاي اعمل شكل للقصيدة .. الله يمسيه بالخير بقي

3- ماذا قدمت لك مزيكا وماذا قدمت لها ؟

انا مقدمتش حاجه لمزيكا .. مزيكا دا بيتي الى بحس بالراحه فيه .. انا يمكن عملت منتدي تاني كان كله من شباب المنصوره .. بس محستش بالراحه الا هنا فى مزيكا .. دا مكاني وبيتي الى اتلميت فيه بعد ما انطردت من مواقع الدنيا كلها ..

والحمدلله اخدت من مزيكا كتير .. اولهم انه حاجه اتولدت على ايدي انا و صاحب عمري الواد ميزو .. تانيهم اني اتعرفت عليه على ناس بحبهم جدا و ناس اكتر من اصحابي .. بجد عشرة عمر مستحيل تتنسي

4- التواضع والطيبة والدماغ العالية صفات بارزة في شخصية ميدو انتا رايك ايه في كل صفة ؟

ايه الكلام الحلو دا .. مقدرش انا على كدا .. هو انا مقدرش احكم على نفسي .. لأن في ناس كتير اوي بتشوفني واثق فى نفسي لدرجة الغرور .. بس يمكن حتة الطيبه دي واخدها من والدي الله يرحمه .. هو الى كان قلبه كبير أوي وكان طيب اوي .. اخواتي البنات بيقولو انى طالع له .. بس انا طبعا متاكد انى مجيش حته ربعه
اما موضوع الدماغ العاليه فـ دا أكيد .. انتى عارفاني .. رئيس مجلس ادارة المهييسين العرب

5- كيف ترى بلدك مصر حاليا ومستقبلا؟

حاليا ؟؟ حاجه زي الزفت .. و ربنا يستر مستقبلا .. مشكلة مصر فى الجيل الحالي .. الاجيال الى فاتو راحو من غير ما يعملو حاجه .. و مظنش ان جيلنا كمان هيعمل حاجه .. لأن احنا عايزين الى يوجهنا .. احنا مش جيل عباقره ولا احنا جيل هنصلح الدنيا بنفسنا .. احنا جيل اتعود ع الانتخه .. عايز حد ياخد بايده ويقوله الطريق الصح اهو .. وبما ان محدش هياخد بإيدنا و محدش هيعبرنا ... تقدري تقولى ان مصر هتفضل فى الانتخه دي كتير .. خصوصا ان لا الى فوق عايزين يعدلو الدفه .. ولا الى تحت هيحاولو يصلحو الحال حتي لو ع الضيق

6- وشايف مزيكا كمان ازي مستقبلا ؟ ونفسك تقدملها ايه تاني ؟ وايه رايك في حملة النهوض والترقي بالمنتدى ورفع شعار لاللمنقول نعم للتعبير الشخصي ؟

مزيكا ان شاء الله هيكون فى تقدم مستمر .. و الترتيب هيعلي اكتر من كدا .. وانا فيه اهو لحد ما اشوفه بينافس جوجل ( واسعه دي )
حملة النهوض بالمنتدي جميله جدااا .. رفع شعار لا للمنقول تحفه .. انا عن نفسي وراها و معاها جدا .. لأن احنا لا عايزين كتاب محترفين ولا احنا عايزين يطلع من وسطنا أديب أو صحفي .. احنا هنا كلنا شباب و تقريبا من سن بعض .. يعني بالبلدي كدا عايزين فضفضة شباب و اصحاب سوا .. لا عايزين فصاحه ولا عايزين افكار جهنميه .. عايزين فكر شباب وكلام شباب بس يكون خارج من عقولنا احنا .. يعني نحاول نفكر شويه ونشغل مخنا حتي فى الكلام الى هنقوله ... مش معقول هتوصل البلاده الفكريه ان حتي دردشتنا سوا فى مشاكلنا او حواراتنا ع المنتدي هتبقي منقوله !!

7- زحمة الحياة وظروفها ضيعت من ميدو ايه اصحابك قرايبك حاجات كان نفسك تحققها وضاعت في الزحمة ؟

يــاه .. زحمة الحياه ضيعت مني كتييير من اصحابي .. احنا كنا شله زي الفل .. الشله المعتاده .. مصفصفتش الا عليا و على ريري .. واحده طبعا اتخرجت و اشتغلت مدرسه اد الدنيا .. والتانيه اتخطبت و مبقتش فاضيه لنا .. حتي اصحابي الولاد الى سافر .. و الى اتجوز بدري .. معرفش انا مستعجلين ع الجواز كدا ليه .
حاجات كان نفسي احققها ؟؟ ممم .. انى اخد الليسانس .. بس انا استعبطت كتير ولعبت كتير .. بس ان شاء الله ملحوقه يعني .. يعني هيروح مني فين .. و بعد كدا لما اتخرج بقي هبقي احاول اظبت حياتي .. و الى هيضيع مني هقولك عليه .
انا يمكن كان نفسي ان كاظم يغني حاجه من كلماتي .. جت عليا فتره كنت بتمناها .. انتى عارفه انا اد ايه بحب القيصر ... بس لاقيت انها حاجه صعبه شويتين .. الراجل بيغني للأستاذ نزار و الرائع فاروق جويده و غني كمان لأمير الشعراء .. و المبدع كريم العراقي .. هيجي يغنيلي انا على اخر الزمن .. و بعدين كبرت يعني قلت بلاش يا واد تعشم نفسك احسن تتتصدم هههه

8- لمن تقول هذه الكلمات : - مااقدرش استغنى عنك – بعدك عني بيسعدني – نفسي ترجع المنتدى من تاني - متوقع منك عطاء اكتر ومواهب دفينة – اتمنى اشوفك وحشتني

مااقدرش استغنى عنك : ماجده
بعدك عني بيسعدني : هو مش لمن .. هو لإيه .. للـحزن طبعا .. محدش بيحبه
نفسي ترجع المنتدي من تاني : سندس .. وحشني مواضيعها ومناقشتها .. الوحيده الى مكنتش بحب ادخل قدامها فى نقاش عشان عارف انها هتقنعني
متوقع منك عطاء اكتر و مواهب دفينه : محمد الدقاق
اتمني اشوفك وحشتني : والدي الله يرحمه

9- ماذا يعني الحب لك ؟

يا سلام .. صدق كاظم لما قال ( عجبي على حرفين قد سلبا وقاري .. حـ حريق .. و بـ بت فى ناري )
الحب باختصار هو حالة فريده بيعيشها الانسان مره واحده فى حياته .. استحاله تتكرر .. حالة غريبه بتجمع بين صفات كل واحده منها الذ من التانيه .. حزن .. شجن .. ألم .. فرح .. جنون .. غيره .. مظنش ان في احساس تاني ممكن يديلك كل المشاعر دي مهما كان

10- بطاقة فيها اهداء من ميدو لمزيكا واعضائها ؟

بحبكم جدااااا .. و نفسي افضل معاكم و وسطكم على طول .. انتو احلي اسره ممكن الواحد يعيش وسطهـا

ونهاية اشكرك جدا على الحوار الجميل وسعة صدرك ونتمنى دايما نشوفك المبدع الشاعر النجم وماتغيبش ابدا عن مزيكا

انا موجود اهو ... انتو بس الى متروحوش بعيد .. انا قاعد و ناس بتيجي وناس بتمشي .. وانا زي مانا

 

[bikky]

واللقاء الثانى مع نجم النجوم محمد الدقاق ونسالة ونقوله
!_محمد الدقاق بما انه عمود مهم من اعمدة كلية الاداب ايه اللى استافدته من السنين الكتير اللى قعدتها فى الكلية؟؟وتقول ايه للشبابعشان ميبقوش اعمدة هما كمان؟
ممم .. بصي يا ستي .. الكليات النظري الى زي حالاتنا .. مش هتستفاد بيها بحاجه مهما قعدت .. ما هو أساسا الدراسات الاكاديميه دي مش هتفيد بحاجه .. هستفاد ايه انا لما اتخرج بمواد الادب المقارن ولا النقد .. ولا حتي الدراما والشعر ؟؟ يمكن كل الافاده هتبقي من الترجمه و الفوناتكس .. الصوتيات .. هتعلمني لغه صح .. غير كدا كله ف طراوه .. و يمكن مستفادتش منها الا اني بقيت بحب القرايه جدا .. بقيت مدمن قراية وبحبها جداوبعدين هو مسألة تبقي عمود او متبقاش عمود .. كدا كدا ف الاخر هناخد الشهاده .. وبعدين والله يابنتي الجامعه دي بالذات الدراسه فيها زي البطيخه ..يا تطلع حمرا يا تطلع قرعه
2- محمد الدقاق شخصية اجتماعية ولا انطوائية؟شخصيتي ؟؟
تقدري تقولى انى شخصيه استثنائية .. ساعات تلاقيني حد اجتماعي جدا وبحب اتكلم واخرج و احب الصياعه و ابقي وسط ناس .. و ف اوقات تانيه .. و دا الغالب .. تلاقيني لوحدي و مع نفسي .. و وقتها برده مش بمانع ان حد يدخل حياتي او يكسر وحدتي دي .. زي ما تقولى انا من دا على دا .. اجتماعي جدا ساعات .. و انطوائي فوق الوصف فى ساعات .. وبعدين دا تبع المود يعني انا لو مودي حلو بحب اكون وسط الناس و انبسط معاهم .. ولو مودي منيل محبش اشيل حد همي او كآبتي ... انا اولي بيها لأن محدش هيستحملني .
3- الحب الاول بيمثلك ايه؟وامتى اول مرة حبيت؟الحب الاول ؟؟
دا فيلم مصطفي قمر الحب الاول دا حاجه زي الفل .. أولا انا مش بثق فى بيت الشعر الى بيقول ( و ما الحب الا للحبيب الاولي ) انا بحب الى بيقول ( كل أنثي أحب هيا أول أنثي ..فليس لدي فى الحب ، حب أخير ) .. الانسان كل ما بيحب كل ما بيتجدد .. كل حب بيكون اول حب من وجهة نظر مختلفه و بإحساس تاني خالصانا يمكن جربت قبل كدا وكنت مفكر انه حب .. بس بعد كدا حسيت انه مكانش حب .. فترة مراهقه و كدا و طلع تعود و مجرد تعلق مش اكتر بس كان بزياده شويه.. و الحمدلله يعني ربنا بيعوض .. تقريبا تقدري تقولى ان الحب الأول بدايته دلوقتي .. و ربنا يكرم و يكمل على خير
4 - ايه رايك فى الحب من طرف واحد ونطلق عليه حب فعلا و لاء؟
الحب من غير أمل .. أسمي معاني الهبل .. مظنش ان ممكن احب من طرف واحد .. الحب حلاوته فى لوعته .. في غيرته .. في اشتياقه .. فى عتابه .. انما حب من طرف واحد بيفتقد لكل دول .. وبيكون بس مجرد سبب للكآبهوالحزن .. و زمن البكاء علي الأطلال انتهي من زمان
5_اللى يحب ممكن يسامح ايه رايك فى المقولة دى؟
أي انسان ممكن يسامح .. مش بس الى بيحب .. الانسان عموما مخلوق بـقلب ابيض .. ملوثتوش الحياه ولا الذنوب .. يعني طبيعي انه بيقدر يسامح وينسي .. خصوصا الى بيحب ممكن يسامح كتير جدا عن أي حد .. وبرده الى بيحب زعله بيكون اصعب .. خصوصا لو من الحبيب .. لأنه ف الغالب مش هيكون متوقع الغلط او الفعل الي يستحق السماح من الحبيب ..
6- انت فين من القسم الاسلامى ؟وهل حدث تغيير ولو بسيط بعد اما بقى ليه مشرف؟
انا موجود .. وبدخل ابص و ارد .. يمكن اه مشاركاتي قليله فيه .. بس انا مشاركاتي قليله ف المنتدي كـ كل .. حصل فيه تطور كبير جدا لما اتعين عليه مشرف .. السكشن صحصح و بقي حلو كدا و حتي زياراته و مشاركاته فى ازدياد ملحوظ .. انا نفسي متابع دا
7_هل بيجيلك وقت تقعد فيه مع نفسك وبتبقى عاوز تتغير فعلا؟
وايه اللى مش عجبك فى شخصيتك وعاوز تغيره ؟وايه اللى حاولت تغيره فعلا ومعرفتش؟مفيش حد فينا كامل و مش عايز يتغير .. بس العيب دا .. ممكن يكون سهل انه يتداري ولا من العيوب البلاوي ؟؟فيا حاجات كتير مش عجباني .. اولهم انى بعيد جدا عن التدين .. انا مكنتش كدا .. دي اكتر حاجه مش عجبانيو الي مش عاجبني كمان بـرودي .. ساعات والدتي و اخواتي بيقولولي انت إنسان بارد .. بس انا بحب ادي لكل حاجه وقتها و مستعجلش .. و طبعا فـ التأني السلامه .. بس انا التأني بتاعي ممكن ياخد ساعات ف حاجه تستاهل دقيقه !! اما الى حاولت اغيره و معرفتش .. فـهو التريقه على مخاليق الله .. تلاقيني بتريق علي أي حاجه و أي حد .. و نفسي ابطل العاده المنيله بنــيله دي .. لأني بجد بكرهها جدا .. بس مش عارف ابطلها ..
8_ايه اكتر حاجة بتشدك فى الشخص اللى ادامك ؟ يعنى الانطباع الاول ليك عنه بيتكون ازاى ؟
ممم .. صعب احدد .. بس انا عموما بحب الانسان المثقف .. مش معني كدا انه يكون دودة قرايه او يكون مثلا عبقري .. بس يكون واسع الاطلاع .. يعني يكون عارف عن كل حاجه أي حاجه .. حتي لو ف كل مجال معلومه .. بس ميكونش عارف عن مجال واحد كل حاجه و مهمل الباقي .. بحب جدا الشخصيه المتنوعه .. او الاستثائيه .. مبحبش الشخصيه التقليديه فى المظهر .. التفكير .. الحياه .. الاسلوب .. ديما بحب الانسان المتميز .. او الانسان الى تلاقيه غير تقليدياما الانطباع الاول فـ دا مبحاولش اخده .. لأنه ف العادي بيكون قايم على احساس او قايم على مجرد تجربه مخدتش وقت طويل .. و أكيد مبتكونش صحيحه لأن اول مقابله الى هاخد منها الانطباع الاول مش هتكون طبيعيه .. هتلاقي فيها الانسان متكلف جدا و مش بيكون على طبيعته .

9-ايه رايك فى سياسة البلد وأنت فين من السياسة؟سياسة البلد ؟؟
ممم .. بصي يا ستي .. بصراحة انا حابب اوي السياسه العقلانيه الى ماشيه بيها البلد فى امور السياسه وادارة الشئون الخارجيه .. احنا حلوين اوي كدا وفى حالنا .. و مينفعش نكون غير ف حالنا .. لأن احنا منستحملش أي حاجه دلوقتي .. كل عيب السياسه الخارجيه .. ان المواطن المصري فى أي دوله اجنبيه سفارته كأنها محل بقاله .. ولا ليها أي لزوم .. زي قلتها يعني . اما فى السياسيه الداخليه ... فـ حدث ولا حرج .. البلد عايزه تمشي تبع مبدأ ( انسف حمامك القديم ) طبعا احنا مش هننسف حمامنا القديم .. احنا هننسف كل حاجه قديمه .. الشعب محتاج ايد حديد تحكمه بجد .. بس تكون ايد عارفه الصح من الغلط .. ايد لو الى تحت غلط تضربه .. و لو الى فوق عدي حدوده تعاقبه .. إيد لا تخشي فى الله لومة لائم .
10_ ايه اكتر حاجة ممكن ماتقدرش تسامح فيها؟
النفاق .
11– أنت شايف نفسك وشخصيتك قوية ولا ضعيفة؟
وايه الموقف اللى فيه تقول بجد انك قوىمم .. دي مقدرش احكم فيها .. بس انا سألت ناس يعرفوني .. و يمكن هما اقرب حد ليا فى الفتره دي .. قالولي ان شخصيتي قويه جدا .. بحب ديما ابقي مسيطر على الى حواليا .. دي وجهة نظرهم لأني معرفش احكم عن نفسي
12-واخيرا وليس اخرا محمد الدقاق راضى عن نفسه بنسبة كام فى المية ؟
مـمـمـم .. ممكن نقول 30%
فاصل ونواصل

 

[Gloming]

ونواصل مع نجم مزيكا اليوم تحت الاضواء ....

مع محمد الدقاق:::

1 ايه اخبارك مع ربنا ؟؟؟؟ كويس ولا مقصر وبصراحه ؟؟

مقصر جدا طبعا .. وفوق التقصير دا تقصير مليون مره .. انا يمكن قلت اني راضي على نفسي 30% لأن الى ناقصني هو التدين وانى اقرب من ربنا و دا الى مخليني مش راضي عن نفسي ولا حياتي .

2 ايه اللى بيعجبك فى المنتدى وايه اللى مش بيعجبك وخصوصا ان المنتدى بيتطور

واعضاؤه بتزيد ؟؟ وايه القسم اللى محتاج يتظبط اكتر من وجهة نظرك؟؟

بصراحه الى مش بيعجبني فى المنتدي انى بحس ان الاعضاء مفكرين ان الاداره شغاله عندهم .. المفروض يكون في تقدير شويه .. يعني العضو من دول لو نزل شكوي او اقتراح ومردناش عليه فى خلال ثانيه الا تلت نبقي اداره تنكه و مغروره و مش بتناقش .. احنا برده ورانا مشغوليات و دراسه و حياه .. المفروض نقدر حاجه زي دي ..

اما بخصوص القسم الى المفروض يتظبط الاسلامي كان مهجور جدا .. بس الحمدلله بدأت الرجل تاخد عليه اهو لما اتعين عليه مشرف .. والتاني هو الادبي .. لأن احنا عندنا الى بيكتبو فى الادبي قليلين جدا .. الادبي عندنا فقير بالمواهب شويه

3 ايه اهتماماتك فى الحياه ؟؟وهواياتك ؟؟

اهتماماتي .. عادي .. بحب الحياه كلها .. بلحظات الفرحه و السعاده .. بـساعات الحزن و الكآبه .. الحياه كلها جديره بالاهتمام ..

هواياتي بقي .. انا بحب القرايه جدا .. خصوصا فى الادب .. روايات .. شعر .. حاجات من دي .. وبحب العب بلاي ستيشن جدا بقي ..

4 ايه رايك فى شباب وبنات اليومين دول؟؟

زي ما قلت قبل كدا .. احنا جيل مظلوم .. محتاجين الى يضربنا علي ايدنا ويقولنا الطريق اهو .. بس بما ان محدش فاضي الا لنفسه .. يبقي محدش هيقولنا ع الطريق .. جيل بجد مظلوم .

5 مين الشخص اللى بتحس ان ليه فضل عليك بعد ربنا سبحانه وتعالى ؟

ممم .. اخواتي البنات .. بعد وفاة والدي الله يرحمه بـسنه و نص .. دخلت تالته ثانوي و كنت مديلها طناش .. و قلت هأجل السنه .. لحد ما اختي الكبيره قعدتني غصب عني فى اخر 22 يوم بالظبط قبل الامتحانات و كانت بتذاكر معايا زي مانا بذاكر .. اما اختي الصغيره .. و دي مش صغيره اوي اكبر مني ب 11 سنه بس هيا عشان الصغيره بتاعتهم .. فـ دي اقرب صديقه ليا و اقرب صحبه ليا ... روح قلبي دي .
وتالتهم مستر سعد الله يرحمه .. دا كان المستر بتاع الانجلش ليا فى الابتدائي و لحد ما دخلت الاعدادي .. بجد ليه الفضل انه كون شخصيتي وتفكيري .

6 ايه اكتر موقف بيستفز غضبك ؟؟؟ وايه الموقف اللى بيحزنك جدا؟؟؟

لما الاقي اتنين اخوات متخانقين سوا .. دا اكتر موقف بيغضبني وبيحزني اوي .

7 تهدى مين ::: ورده ...كلمه شكر ..... اعتذار ....احترام ؟؟

ورده : ريري

كلمة شكر ::::::: اخواتي البنات

اعتذار ::::::::::: والدتي

احترام :::::::::::: أبو تريكه

8 مين الشخصيات اللى بتحس فعلا انك بتقدرها فى المنتدى ؟؟؟ ومين الشخص اللى غير مفاهيم فى حياتك من المنتدى برضه ؟؟

الشخصيات الى بقدرها في المنتدي .. ميزو نت دا صاحب عمري .. رانيا اختي الكبيره .. في اكرم .. فيه جلومنج .. بيعجبني ارائهم جدا .. فيه لونلي مودي بيعجبني مواضيعه .. ساره بريتي آيز طبعا دي معرفة صداقه بجد مش نت من اول ما دخلت الجامعه .. بجد فيه كتير جدا يستاهلو التقدير

مفيش شخص معين غير حياتي .. لا من المنتدي ولا بره .. انا حياتي هيا هيا .. بس يمكن انا بحب اراء الاعضاء هنا بالذات و بتغير في تفكيري شويه .

9 ايه رايك وبصراحه فى ::

التعليم .. نظام فاشل

الصحه : بقت فى النازل
القوي العامله : هو فين القوي العامله ؟؟ البطاله زي الفل اهي
الهجره : مهيش حل .. رافضها جدا
أمريكا : اسرائيل بس متنكره
وزراء مصر : شلوت سعتك دفعه للأمام يا ريس
الأحزاب المصريه : هو في غير الحزب الوطني ؟؟

10 احكى اكتر موقف محرج حصل معاك ومش قادر تنساه ؟؟؟

هو مش موقف محرج .. هو من كوميدي على محرج .. انا ليا اتنين اصحابي .. دانا و ريري .. الى اتكلمت عنهم فوق .. فى مره فاتو عليا فى البيت و والدتي قالتلى انزل وصل اخواتك يابني .. وانا كنت مضرر جدا انزل اوصلهم ليه مهم زي الفل يعرفو يروحو لوحدهم .. المهم قالولي احنا زهقانين من نظام اليوم و مخنوقين و طالع عنينا .. ايه رأيك نروح بكره راس البر نغير جو .. قلتلهم انا مفلس معاكو فلوس ؟؟ قالو اها معانا يكفي اليوم مش مشكله يله .. قلتلهم وماله يله .. طبعا نزلت لهم متاخر كالعاده و روحتلهم .. لا فطرت ولا بتاع .. وصلنا راس البر وانا طبعا جوعت .. قالو هنقضيها اي حاجه ع الماشي قلتلهم لأ طبعا .. ماشي ايه .. دخلنا رستوران فطرنا و الحمدلله .. دفعنا فيه 74 جنيه تقريبا و مشينا مفلسين .. طبعا احنا ف الشتا والبلد فاضيه .. بس و نوبة هيسترية ضحك بقي وقعت علينا .. فضلنا نضحك مش عارف على ايه لدرجة اننا وقعنا ع البيتش من الضحك .. لحد ما ربنا ستر وافتكرت ان ليا ابن خالتي شغال ف راس البر اتصلت بيه و رحتله .. واصلا مكانش معانا دقيقه ع الموب غيرها ههههههه بجد كان موقف جامد جداا منساهوش عمري

باشكرك جدا على الحوار الجميل ده ..

انا الى بشكرك جدا يا جميل .. فكرتوني بذكريات عسل .. يارب ما ترجع تاني هههه

وانتهى حوارنا مع ميدو الدقاق ...حوار كان جميل جدا بصراحه وكلنا استمتعنا بيه

انتظرونا مع مزيكاوى اخر تحت الاضواء مع الثلاثى

ابقـــــــــــــــــــــــــــــــــــــوا معنـــــــــــــــــــــــــــــا

 

[نور & نودة]

نجمة الاسبوع الثاني مع ثلاثي اضواء مزيكا نجمة ماحصلتش نجمة كنت متاكدة اني حاالاقيها تاني
نجمة نورها غطى المنتدى كله زي ماكانت زمان وبنقولها حمد الله على سلامة رجوعك المنتدى وقريب عاوزين نقولك حمد الله على سلامة رجوعك أرض الوطن ان شاء الله يا سندس (اسراء)

1- من هي اسراء برغم انك غنية عن التعريف لان اللي مايعرفك يجهلك فعلا ياأم تسنيم ؟وحاسة نفسك من اي جيل بالضبط ؟

السلام عليكم ورحمة الله وبركاته ، بداية أشكرك يا رانيا على هذه الإستضافة التى فاجأتني بصراحة لأني وإن كنت قديمة فى المنتدى إلا أن الاعضاء الجداد لا يعرفوني ، وإن شاء الله أشارك مرة اخرى وسط هذه الجو الأسري الجميل ، فإسراء أو سندس مهندسة مدنية موش حقول عندى كام سنة لأن مفيش واحدة ست بتقول ههههههه لكن يتعرف من ورانا أوك ، وأنا من هذا الجيل اللى حضّر شنطة سفرة ونط على الأمارات .

2- اسراء اقدم وأول من عشت معها اجمل ذكريات مزيكا وذكريات متضاربة وجميلة جدا ماتتنسيش يا ترى بتمثلك ايه ذكريات مزيكا ؟

يمثل لى ذكريات جميلة جدا ، لدرجة إنى عندما أجلس على الكي بورد فى الشركة التى أعمل بها أتذكر مزيكا اليوم مباشرة ، فأصبح بينى وبين مزيكا والكي بورد عيش وملح ، أقول إنى لو خرجت من مزيكا برانيا وبيكي وأكرم لقولت هنيئا لك يا بت يا سوسو ، لم أكن أتخيل أنى من النت ممكن أكون أصدقاء يكونون لى كأخوتي ، جمعت الذكريات الجميلة بينى وبين رانيا من منافسة فى المنتدى ومن مشاكسات ومن تقديم نصيحة لبعضنا البعض لله ليس إلا ، وكذلك بيكي وكذلك أكرم ، ذكريات كثيرة متدافعة مع هؤلاء الأشخاص ومع غيرهم كلف بور بروفيت لا أعتقد أن هذه الذكريات بسهولة ممكن تروح مني .

3- بحبكم وحشتوني دي على بالك وفي خيالك كل يوم بتوجهيها لمين ؟

لعائلتي كلها فى مصر لأن السفر صعب وأحيانا الإنسان يستسهل السفر في البداية ثم يتبين له بعد ذلك الضريبة التى سيدفعها من بُعده عن الاهل والناس، حقيقة هذه ثروة غالية لا يدركها ولا يعرفها إلا من جرب الغربة ، فأحيانا أجلس مع نفسي أبكي بكون مشتافة أنى اشوف إسكندرية وبحرها ، والناس اللى تربيت وسطهم ، لقد تعلمت من الغربة أن هناك ناس تصلح للغربة وناس لا تصلح لها وانا من النوع الاخير .

4- لما نقول اسراء يعني مزيج متناغم ورائع من الروح الجميلة والثقافة والابداع والثقة بالنفس والرضا الديني والتواضع والالمام بكل مايحدث على الساحة العربية والدولية يعني سياسية درجة اولى ماسر هذا المزيج الرائع والنجاح المستمر؟ ومين اكتر شخصية تاريخية اتاثرتي بيها وبهرتك ؟

كل إنسان على حسب ما نشأ عليه ، هناك من نشأ على القصص وهناك من نشأ على الشعر كل واحد له مجال يحب أن يبدع فيه ، أنا أحب أن أكتب فى المواضيع الاسلامية ليس بالشكل النمطي ولكن بالشكل الواقعي القريب مننا فى الحياة ، بمعنى أركز الضوء على ظواهر المجتمع سواء كانت سياسية أو أجتماعية وأعالجها من منظور الفكر الاسلامي ، هو ليس فى الواقع مزج ولكنها قاعدة فكرية متمثلة عندي فى ثوابتنا الاسلامية أنطلق منها محلقة فى فروع المعرفة الأخري ، وحقيقة أنا معجبة بالشخصية التاريخية الرائعة عمربن عبد العزيز رحمه الله وأرى أنه صاحب منهج ورسالة لو طُبقت كما هي لصافحتنا الملائكة فى الطرقات .

5- تسنيم بنوتك الجميلة ربنا يكرمها ويجعل في الخير كله يارب ياترى حسستك بايه وهيا بتكبر يوم بعد يوم ومسؤلية الامومة معاها شايفاها صعبة ومتعبة ؟

عارفه إن البنت بعد الجواز بتشعر بمسئولية ملقاه على أكتافها ،مسئولية بيت كامل مطلوب منها إنها تقوم به ، كنا ونحن فى بيت أهلنا نساعد أينعم ولكن لم نكن نتحمل مسئولية البيت ، شعور الانسان أنه أصبح وحيدا ومسئول وحده هذا وضع مقلق ربما فقط فى البداية ، لكن مع وجود طفل بتزداد المسئولية ، ولكن عارفه المسئولية اللذيذة ، هذه ما أقصدها ، مسئولة عن طفلة أفكر فى مستقبلها كيف سأربيها وماذا سأعلمها فى هذا الوقت الذى اصبحت فيه القيم مختلة ، لكن مع ذلك أعيش معها كأني طفلة ، أفرح لفرحها وأتألم لمرضها ، تشعرين مع طفلك بتوحد الذات حاجه ربانية لا تشعر بها المرأة إلا مع طفلها فقط .
وياترى ان شاء الله حاتعامليها نفس معاملة والدك ووالدتك ربنا يحفظهم ليكي لانهم اكيد تعبوا عشان يخرجوا المزيج الرائع من شخصية اسراء ؟واحلامك المستقبلية ان شاء الله معاها ايه ؟
بالتأكيد فيه أشياء كثيرة تعلمتها من أبي وأمي سأعلمها لطفلتى وأري أنها ضرورية جدا فى تكوين شخصيتها وأري إن الطفل يشعر بالأهتمام من والديه هذا بيقوى نفسيته جدا ، هذا ما شعرت به ، فأنا محظوظة جدا وفضل ومنة من الله تبارك وتعالى أن أنعم عليا بأبي وأمي بتفكريهم التربوي العالى ، ولكن مع ذلك أكيد كانت هناك سلبيات سأجتنبها فى تربية بنتي كالمتابعة المبالغ فيها التى تخرج من حد الاهتمام إلى حد التضييق وأشياء أخرى ، ثم إن كل عصر بيفرض اسلوب مختلف وثقافة مختلفة فى التربية على حسب كل عصر مع الحفاظ على الثوابت الاخلاقية والتربوية الراسخة التى لا نقاش فيها ، وأنا شخصيا لا أحدد لها فى المستقبل إن شاء الله مهنتها ولا أى شىء فقط أنا أضعها على الطريق الصحيح وأترك لها حرية الاختيار ، فدوري هو تنوير عقلها وتعليمها جيدا وإحتوائها وهى تلقائي ستتصرف التصرف الصحيح إن شاء الله .

6- كلمة توجهيها لكيمو (اكرم صبري) بمناسبة المفاجاة الجميلة دي واللي مخبينها عنه لحد مايرجع ويشوفها بنفسه بعدما حنسناه ؟

أقوله أتمنالك بجد حياة سعيدة مع شريكة حياتك حبيبة قلبي وهى إنسانة ممتازة على المستوى الانساني وعلى المستوى الدراسي ، أقول له ربنا يسعدك وتعالى للمنتدى بسرعة علشان ترجع مشاغبات زمان من تاني .

7- ايه رأيك في المنتدى والمجلة من ساعة ماسبتيه ليومنا ده ؟ وايه اقتراحاتك وحاسة ان ممكن يبقى أحسن والأعضاء عندهم طاقات أكبر من كدة ؟

المنتدى إستيله إتغير وسريع جدا الله أكبر وده شىء جميل ، أما على المستوى الثقافي فهو أفضل من زمان وظهر فيه كثير من الاعضاء رأيت لهم مواضيع وردود جميلة جدا ، وانا نفسي نعمل مسابقة فى العام يشرف عليها لجنة منظمة تطرح كل فترة عنوان موضوع وتترك الاعضاء تكتب فيه توبيكات ويتم إختيار أفضل توبيك ويكرم صاحبة بجائزة قد تكون عضوية مميزة او أكونت رابيد شير بشرط ألا يكون التوبيك منقول ، فهذه خطوة ممكن تدفع المنتدى للأمام أكثر وتساعد الاعضاء وتشجعهم على الابداع .

8- وايه رأيك في الحياة برة مصر على الصعيد الاجتماعي والعملي والأخلاقي ؟ وايه رأيك في الأحداث الأخيرة اللي أكيد بتسمعي عنها في بلدك مصر ؟ولو لم تولدي مصرية كنتي حاتتمني تكوني ايه ؟

قلت أن على المستوى الإجتماعي أشعر بغربة ، وحقيقة لا يمكنك فى بلد عبارة عن كوكتيل جنسيات إنك تكوني إنسانة إجتماعية ، ولكن فى الغربة يكون الانسان عملي أكثر منه إجتماعي ، فخارج مصر لا مكان للمتكاسلين ، ببساطة اللى موش حيشتغل وينتج ملهوش مكان يرجع لبلده يقعد على القهوة أحسن ، فالغربة كما تعطيكي كما تأخذ منك ، فاحيانا عندما أحسبها اشعر أننى أستفدت من الغربة رغم مدتي القصيرة ، وأحينا اخري اشعر أن الغربة موش جايبة همها ، وطبعا أتابع كل صغيرة وكبيرة عن مصر ، وبالمناسبة ليس المصريون فقط هم المشغولون بمتابعة اخبار بلدهم فى الخارج بل كل العالم العربي متابع لأخبار مصر ، ولو لم أكن مصرية لوددت أن أكون مصرية مرة واثنين وألف ومليون ولا يعرف قيمة ترابك يا مصر إلا اللى بَعد عنك .

9- كلمة أخيرة تحبي تقوليها بمناسبة نورك اللي غطى مزيكا واحساسك ايه بالعودة بعد طول غياب ؟

وحشتوني جدا ويا رب ديما مع بعض فى خير وسعادة

10- ايه خططك التالية للمنتدى ؟

كتير إن شاء الله وربنا يسهل ونحاول نحقق مع بعض أى حاجه لمزيكا

في النهاية أحب أحييكي جدا لسعة صدرك وبهديكي أجمل التهاني لرجوعك الجميل
وبقولك اسراء فكر وروح وأخلاق من أغلى كنوز الأرض وغلاوتك بتزيد باحترامك وأخلاقك وقلبك الجميل

انا بجد اللى سعيدة جدا بهذا الحوار الذى افرحني كثيرا وهو تقدير لي أشكرك عليه يا رانيا وهذا ليس غريباً عليكي فإنتى أهل للواجب كله.

 

[bikky]

ونواصل مع نجمة المنتدى وشمعنه المضيئة بنور العلم والايمان اسراء(سندس)

أهلا بيكى يا سندوسة

1\ اسراء كنتى متخلية أنك لما ترجعى المنتدى من تانى الاعضاء هيستقبلوكى أزاى؟

بصراحة مكنتش متوقعة الاستقبال الجميل ده ، وخصوصا إن فيه من الأعضاء ناس جديدة يمكن موش تعرفني أوي لكن الحمد لله أخدنا على بعض بسرعة .

وكنتى متوقعه المنتدى يبقى ازاى؟ ودلوقتى لقيتيه أزاى؟

كنت متوقعة حرجع ألاقي المنتدى العام على حال ما تركته ولكن عندما رجعت وجدته أنه تطور أكثير واصبح يدخله الكثير من الأعضاء وهذا شىء اسعدني جداً

2\ اسراء شيفة نفسها اجتماعية ولا انطوائية؟

أنا بحب الناس ، وإجتماعية فى محيط الناس اللى أعرفهم ولكن لو ناس جديدة لا أعرفهم فتجديني اسمع أكثر مما أتكلم .

3\ايه رأيك فى المقولة اللى بتقول

((وراء كل عظيم امراة ))؟

مقولة صحيحة ، لأن الست هى عمود البيت وإذا لم تكن موفرة لزوجها الراحة الكافية فى بيته فلن يبدع ولن يتقدم ، فالرجل والمرأة فى الحياة إذا لم يكونوا يدا بيد مع بعض فلن يحقق أى منهما شىء ، ولكن بلاش وراء كل رجل ولتكن بجانب كل رجل عظيم إمرأة

4\ ايه رايك فى الناس اللى بتهاجم الحجاب والنقاب؟

أنا أرى أن المحجبة والمنقبة لا تؤذى مشاعر الناس فى الشوارع فلماذا يهاجموهن ، فإذا كان هؤلاء الماهجمون يتركون من تلبس البكيني ومن تلبس محزق والعاري تحت شعار الحرية الشخصية ، فهل الحرية الشخصية شملت الدنيا كلها وجاءت عند المحجبات والمنقبات وإنسدت فى جوههن ، هذا على منطقهم ، أما الحق فالحجاب أمر شرعي إلا يجادل فى مشروعيته إلا جاهل .

5\ اسراء اخبارها وحالتها الاسرية ايه بما أنها موظفة وأم وزوجة ؟

الحمد لله تسير الأمور بشكل جيد ، فما بين العمل والاهتمام بالبيت تجد الواحدة مننا نفسها غير متفرغة للقيام بأى نشاط إجتماعي أخر ، ولكن إحساس جميل أن يجد الإنسان نفسه متفوقا فى عمله وفى بيته ، ولكن أقول بصدق ان البيت يأتي فى المرتبة الاولى ومن تجد نفسها مقصرة فى حق بيتها عليها أن تترك عملها ، وبعض الناس أساسا بتعترض على عمل المرأة أقول لهم لا تعترضوا هكذا والسلام ولكن فقط إعرفوا ظروف الناس فعمل المراة حاليا ليس للوجاهة ولكن للمشاركة فى ميزانية الأسرة فى ظل الحياة الصعبة التى نعيشها .

6\ أمتى تقولى على شخص دا اختى او صديقتى ؟وما مدى ثقتك بالناس؟

أقول على واحدة هذه أختى لما اجدها تتكلم معي من القلب ، فهذا أستشعره بحسي ، فللاسف كثير من الناس لا تفتح لك قلبها ويحدثك لسانها بما يخالف ما فى القلب ، ولكن عندما اجد الصديقة التى تفتح لي قلبها أقول هذه أختي ، وأنا لا اثق بالناس الذين لا أعرفهم ، ولكن الثقة تأتي بالمواقف التى تبرهن على الثقة دي .

7\أكيدالواحد وهو مسافر بيسيب حاجات وهو ماشى فى بلده أنتى بقى ايه اكتر حاجة محبتيش تاخديها معاكى وأنتى مسافرة؟

وايه أكتر حاجة اصريتى أنها تكون معاكى؟(مقصدش متعلقات شخصية)

هى موش حاجات معينة محبتش أخدها معايا ، ولكن لم أعمل مثل كثيرين من الناس الذين باعوا شقتهم فى مصر والاثاث وكأنهم يعلنوا للكل ( إحنا موش راجعين ) ولكن قفلت الشقة وغطيت الاساس لإيماني إنى مقدرش أعيش بره مصر فترة طويلة ، أما أكثر شىء أصريت يكون معايا سلسلة فيها أيه الكرسي أخذتها من والدتي قيل السفر .

8\تفتكرى دلوقتى ان المرأة صعب تحصل على حقوقها الشرعية أيا كانت وهل يعتبر حقها مهضوم فى أشياء كثيرة؟

أنا لست مع جميعيات حقوق المرأة ، وأرى أن هذه الجمعيات فرقعات فى الهواء ، وزمان كانت الحركات النسائية يمولها الاستعمار ، لأن هذه الجمعيات لم يكن غرضها حقوق المرأة ولكن تمييع المرأة ، فما علاقة الحجاب على سبيل المثال بالإضطهاد ؟! ، نعم المرأة كانت مظلومة وسُلبت منها حقوقها الاسلامية ، الواجب هو إرجاع تلك الحقوق الاسلامية لها دون أى مزايدات غربية ، وأنا أرى المرأة حالياً غير مهضوم حقها ولا حاجه ، وأقول للناس بتوع جمعيات حقوق المرأة اللى بيقولوا المرأة مضطهده علشان مدخلتش البرلمان إهتموا أولا بالارامل والمساكين من النساء ، فماذا يفيد المرأة دخول مجموعة من عواجيز النساء إلى البرلمان من اللاتي تجاوزن الخمسين من العمر ، هل هى شكليات والسلام ؟!

9\ فيه ناس ممكن من مرة أو من مجرد النظرللشخصية اللى ادامها تفهما

اسراء كدة ولا بتفهم اللى ادامها ازاى؟

لا أنا بفهم اللى قدامي من تصرفاته ، فانا مراقبة جيدة لتصرفات البنى أدم اللى قدامي ومنها أحكم عليه ، لكن حكاية النظرات دي موش بعرف فيها .

10\ ايه اكتر حاجة تعباكى أو تعبتك فى الغربة؟ وتقولى ايه للشباب اللى عاوز يهاجر ويسيب البلد وزهقان منها؟

أكتر حاجه تعبتنى فى البداية هى الوحدة ، فالمجتمع كله غريب عني ، ولكن تدريجيا يتم التعود ، وأنصح الشباب اللى عايز يسافر أنه يخلى السفر ده أخر الحلول عندما يضيق بهم الحال عن أخره لأن السفر متعب جدا .

وأخيرا وليس اخرا تنصحى شبابنا وبناتنا بايه؟

من يتقى الله يجعل له مخرجا

بشكرك جدا يا سندوسة وفاصل ونواصل

اوعو تروحو فى أى حتة

 

[Gloming]

ونواصل مع نجمه مزيكا اليوم ((سندس))
بنرحب بيكى هنا معانا من تانى فى منتداكى :::

ايه اخبارك مع الله ؟؟وهل انتى راضيه عن نفسك ؟؟؟

بالـتأكيد غير راضية والإنسان دائما يسأل الله أن يعينه على ذكره وشكره وحسن عبادته ، فهمهما تعبد الانسان لله سيظل يرى فى نفسه التقصير ، فنعم الله علينا كثيرة أسأل الله أن يعنى على شكره ، أما نفسي فأيضا غير راضية عنها وكما قيل النفس والهوى والشيطان كيف السبيل وكلهم أعدائي ! .. أسأل الله عز وجل أن يعنى على نفسي وعلى الهوى وعلى الشيطان .

ايه رايك فى حال مصر ؟؟؟ وشبابها ؟؟؟ وسياستها العامه ؟؟؟

تبدو مصر هذه الأيام مثل حافلة مخطوفة مصيرها معلق بين النزوات المحتملة لخاطفيها والسلوك المحتمل لراكبيها، فقد راحت مصر العميقة الطيبة المؤمنة ترفع أياديها نحو..السماء متوجهة بالدعاء إلي الخالق عز وجل لعل القضاء والقدر يضع حدا لعبث العابثين ويفرج..كرب المكروبين .. هو ده حال مصر ..
أما شباب مصر فيهم الخير ولكن محتاجين أن يعرفوا اين الطريق .

ايه رايك فى الاعضاء الجدد فى المنتدى ؟؟؟؟ وهل هم احسن من خلال كتاباتهم عن القدام ولا لا؟؟
هناك مجموعة مميزة جدا من الأعضاء الجدد ولهم كتابات رائعة وبفرح جدا لما اجد العضو كاتب توبيك يحمل إسمه ، وهم بالفعل بيعبروا عن واقعهم بشكل جيدا جدا .

تهدى لمين :::: ورده .....كلمه شكر ...احترام ...اعتذار ... ندم
وردة ...............................لأمي
كلمة شكر ...............................لزوجي
إحترام ..............................................أبي
إعتذار ................................................لأ ى حد زعلته
ندم .................................................. .. مفيش الحمد لله إلى الأن .

ايه اكتر موقف بيحزنك؟؟وايه الموقف اللى بيستفز غضبك ؟؟؟
أحزن عندما أشعر أنى وحيدة ، وأغضب من الأشخاص الإنتهازيين اللى ميعرفوش حد إلا لمصلحتهم
مين الشخص اللى بتحسى ان ليه فضل عليكى بعد ربنا سبحانه وتعالى ؟؟
أمي وقفت معي كثيرا وعلمتني كثيرا ربنا يحميها يا رب ويديها الصحة .

ايه اللى اتعلمتيه من المسئوليه اللى عليكى من بيت واسره وشغل وغربه فى نفس الوقت ؟؟؟

تعلمت أن أكون أن الشغل مفيهوش مشاعر و أن أكون حازمة فى أوقات الحزم وأن البيت أهم من الشغل .

ايه امنياتك فى حياتك الخاصه ؟؟؟ وامنياتك لبلدك ؟؟؟؟
أتمنى إن شاء الله السعادة فى حياتي الخاصة وتأمين مستقبل أسرتي الصغيرة ، وأتمنى لبلدي الأمن وتحسين حالة الناس الاقتصادية .

مين الاعضاء اللى كانوا دايما على بالك وانتى بعيده عن المنتدى ؟؟؟؟
نور نودة وبيكي واكرم

ايه الهوايات اللى بتحبى تمارسيها بصفه مستمره ؟؟؟ وايه اهتماماتك ؟؟
زمان كنت بلعب كرة يد لكن دلوقت لم تبقى من هوياتي سوى القراءة ومن إهتماماتي سوى تسنيم والبيت والشغل .

ايه رايك:::: (فى سطرين ))
زواج المسيار .... بيع الاعضاء البشريه .... الصداقه بين البنت والولد ....القطاع العام والقطاع الخاص
الهجره ....فتاوى الفضائيات
زواج المسيار ................... مشاكله كثيرة ولا يحقق الغرض الشرعي من مفهوم تكوين الأسرة .
بيع الاعضاء البشرية ...............................تجارة ضد حقوق الانسان .
الصداقة بين الولد والبنت ..........................................أعترف بالزمالة فقط فى حدود الدراسة او الشغل .
القطاع العام والخاص .................................................. .... كمثل الميت والحي .
الهجرة .................................................. ................. معها ولكن كأخر الحلول .
فتاوي الفضائيات ............................................... كثيرة جدا وأري أن كل انسان يركز مع شيخ يثق به ويأخذ منه الفتوي وليس من أى أحد .

باشكرك جدا على الحوار اللذيذ ده ...الف مبروك رجوعك مزيكا ...
ويارب ترجعى بلدك قريب

 

[نور & نودة]

اسبوع جديد مع الثلاثي ونجم جديد ونجمنا الاسبوع ده هوا كاميلو الفارس المجهول يقل تواجده في المنتدى جدا ولكنه يظهر بالمفيد كله من برامج وكل جديد فيها



1- محمد (كاميلو ) عرف نفسك للي مايعرفش مين محمد ؟

اسمى محمد 29 سنة فني اتصالات


2- محمد البرامج في عالم تكنولوجيا المعلومات والحاسوب ماذا تمثل لك ؟

انا اعشق البرامج واحببت فيها مساعدة الاخرين

3- ماهو رايك الشخصي في حال مصر في الفترة الحالية وما هوا السبيل للنهوض ببلدنا مرة اخرى ؟وما موقفنا من دول العالم حاليا ؟

حال مصر اية بس تدهور سياسي ومجاملات من الكل للكل حتي يظل الكل مكانة
ومع كل كارثة لا يتحرك احد وتسمع الجملة الشهيرة نحن ننفذ اوامر القيادة و و و
ولا نعلم لطالما ينفذون الاوامر اذا ما فائدتهم
وحال مصر يذكرني برواية عفوا حدثت في عهد معاوية وساذكرها كما اتذكر
وقف معاوية يخطب وم الجمعه وقال المال مالنا والارض ارضنا ..... الي اخر الخطبة ولم يقاطعه احد
وفي الجمعه التالية قال نفس الخطبة ولم يقاطعه احد
وفي الثالثة قال نفس الخطبة فقاطعه رجل من الشعب وقال لا المال مالنا الارض ارضنا فنادي علية الخليفة معاوية وكان معروف بقوتة فقال الناس لقد هلك الرجل
ولكن قال معاوية لقد احياني هذا الرجل وقال سمعت رسول الله صلي الله علية وسلم سياتي يوما يتحدث الحكام ولا ردهم احد اولائك سيتقاذفون في النار كما تتقاذف الحجارة ( عفوا فانا لا اذكر الحديث نصياً ) فخشيت ان اكون منهم فقلت خطابي وعندما لم يدني احد قلت انا من هولاء القوم واعدتها في التالية ولم يردني احد فقلت انا اكيد منهم واعدتها في الثالثة فردني هذا الرجل فقل الحمد لله انا لست منهم
هذا هو حالنا

4- ماهي تطلعاتك المستقبلية لحياتك القادمة ونفسك تحقق ايه ؟

اتمني ان اتقرب من الله واستقر في حياتي الشخصية والعملية


5- اهم مايشغل بال وتفكير محمد في هذه الفترة ؟

بنت الحلال ههههههههههه

6- تهدي لمين ؟

- كلمة شكر – لشخصية فعلا مش عارفها ربنا جعلها السبب في اني اقدم في الشغل
- كلمة عتاب – لكتييييييييير اوي من ناس كنت فاكرها اصحابي
- صاحب صاحبه – ميزو
- وحشتني – ...................
- الحياة من غيرك مالهاش طعم - منتدي المزيكا اليوم
-
7- ايه رايك في مزيكا وشايف انها بتتطور للاحسن ولالا ؟

الحمد لله مزيكا في تطور انا سعيد جدا بالتطور الجديد في المنتدي الاسلامي

8- ايه اللي حلمت بيه تشوفه في مزيكا وماحصلش ؟واقتراحاتك للمزيد من التقدم ؟

حلمت بمكان اكبر من دة لمزيكا لكن للاسف وقدر الله وما شاء فعل كثرة المشاكل التي واجهتنا
اما التقدم فمطلوب تقارب اكثر من الاعضاء وتعاون

9- كلمة تحب توجهها لاعضاء مزيكا ؟

بلاش النت يلهيكم عن ربنا

10- احلامك الاسرية مستقبلا بتحلم بايه ؟

بحلم بزوجة تصلح ام لأولادي

في النهاية احب اشكرك جدا على وقتك الثمين معنا واتمنى لك التقدم والتوفيق ان شاء الله

 

[bikky]

ونواصل مع الفارس المجهول كاميلو حواره ونقوله

1\ ايه السر اللى ورا اسم كاميلو ده؟وليه انت مجهول فى المنتدى؟

ة اسم كان داما بيناديني بية واحد من اعز اصدقائي ام الدراسة ولما دخلت نت احترتة

2\ممكن محمد يحللنا شخصيته ؟

انسان معقد يفكر في كل شئ واي شئ

3\ موضوعك الاخير اللى هو موسوعة برامج الاطفال فى جميع المجالات

ايه اللى خلاك تفكر فى الموضوع ده ؟وايه شعورك لما قررت وبدأت فيه؟وايه شعورك لما نزلته؟

انا كنت ببحث عن برنامج لاحد اصدقائي لاطفال ولقيت بعض البرامج علي المنتديات منها اللي الروابط مش شغالة ومنها اللي وصفة غير عملة قررت اجمعهم كلهم في موضوع واحد وطبعا قررت اشوف كل ما يخص الاطفال في ك المجالات

لما بدأت فية طبعا كان مرهق الجمع والتحميل والرفع والتنسيق ... الخ

ولما انتهيت حسيت اني عملت حاجة وطبعا من تعليقان الناس

4\الحب بالنسبالك يعنى ايه؟ وايه رايك فى حب النت؟

الحب كنز مفقود اتمني ان اجدة يوماً

مفيش حاجة اسمها حب نت لان اولا كل الحب واحد

يعني اختلفت الطرق والنهاية واحدة

ثانياً اللي بيحصل ع النت دة تعارف اما الحب بيجي مع الوقت والمعرفة الجيدة بعد التعارف

5\ايه رايك فى المثل ده

""تعرف فلان ..أعرفه..عاشرته..لا..يبقى متعرفوش؟

صحيح 100%

6\ايه اللى بيخليك تحكم ع الشخصبة اللى ادامك؟والانطباع الاول بيتكون عندك ازاى؟

اكيد تصرفتا الانطباع الاول يدوم :d

7\هو الواحد لو واثق فى حد ممكن يعمل اى حاجه عشانه لمجرد انو واثق فيه او شابفه انو حد محترم ؟

اكيد لكن دايما انا بقول ان الثقة ليها حدود ومش هتوصل اني اعمل أي حاجة الا لو وثقت مليون في المية ودة طبعا بيكون مع الوقت

8\ايه اكتر حاجة عجبتك فى مزيكا ومكنتش متوقع أنها تبقى موجودة

بعض الصداقات

9\ مين اكتر حد أثر فى شخصيتك وغير حاجات فى حياتك؟

الكتاب

10\ممكن تدى لقب للناس دى على حسب معرفتك بيهم

ميزو مدمن مزيكا

– سيد روك ابو تريكة المنتدى

– – نور &نودة سيدة المنتدى

– – أكرم صبرى الصحفي

– بيكى شعاع النور

وأخيرا وليس أخرا تنصح شبابنا وبناتنا بايه؟

نحاول كلنا نقرب من ربنا ونجعل رمضان بداية وليس موسم

ونجعله شهر عبادة وليس عادة

وأتمني أن نبتعد عن رايات الضرار ( العولمة والانفتاح وما شابه ذلك من مصطلحات ظاهرها الرحمة وباطنها العذاب )

وان نتحول من جيل الصيحة الي جيل الصحوة

فــــــــاصـــــــــــل ونــــــــواصــــــــــــــــــــل

 

[Gloming]

ونواصل مع نجم مزيكا ((كاميللو))....

كاميللو هل انت راضى عن نفسك ؟؟؟ وخاصة فى علاقتك مع ربنا ؟؟

لا طبعاً

ايه اكتر موقف بيزعلك ؟؟؟ وايه اكتر موقف بيستفذ غضبك ؟؟
اكتر موقف بيزعلني خسارة صديق واكتر حاجة بتستفذ غضبي الغباء

ايه رايك فى ::::
هجرة الشباب .... هروب من واقع مر الي واقع احيانا آمر
احزاب مصر ..... زي السمك بياكل في بعض وخلاص
وزراء مصر ...... موظفين حكومة
امريكا ....... اية فرعنك يا فرعون
القوى العامله............ مين دي
التعليم .... اسوء منظومة ادارية في مصر
الصحه.......... الحمد لله


الحياه مدرسه كبيره اتعلمت منها ايه ؟؟؟
اني لسة متعلمتش

هل تعتقد بوجود الحب الاول ؟؟؟ وهل فى صداقه حقيقيه من وجهة نظرك ؟
الحب الاول هو الحب الاخير
الصداقة اكيد موجودة

ايه اكتر قسم بتحس انه محتاج يتظبط فى المنتدى ؟؟
مازال الاسلامي هو في تحسن لكن لسة

مين اقرب اشخاص ليك فى المنتدى ؟؟ ومين الاشخاص اللى بتحس فعلا انهم غيروا كتير فى مزيكا ؟؟
اقرب شخص اكيد ميزو اما اللي غيرو كتير وبلاش اسماء علشان منساش حد ويزعل

ايه اللى نفسك تحققه والظروف بتمنعك ؟؟
الغاء دولة الميكروباص بسبب قلة الادب اللي هما فيها وكأنهم عايشيين في الدنيا لوحدهم

احكيلى موقف متقدرش تنساه وبتضحك كتير لما بتفتكره
معلش اصل الذاكرة عندي ضعيفة اوي

باشكرك على حوارك اللذيذ ده معانا ...أتمنى ليك التوفيق فى حياتك
انا اللي بشكركم جدا واتمني التوفيق للجميع

انتظرونا مع عضو اخر تحت الاضواء مع الثلاثى

ارجوكم ..............ابقـــــــــــــــــــــوا معنا