عزومة فرح لشلة الرقص والفرفشة

[نور & نودة]

عزومة فرح لشلة الرقص والفرفشة

البت عديلة بنت ام عديلة ربنا عدلها حالها وفرحها قرب قاعدة تخطط وترسم وتدور وتبحث وسط شلة صاحباتها وزمايلها مين الل تعزمه ومين ييجي ومين لا والوسواس الخناس قاعد يوسوسلها عازين ليلة ماحصلتش عاوزين فرح يكسر القاعة وكله يخرج يحلف بيه
وتتصل بفلانة وعلانة من اشهر بنات الرقص والفرفشة وموش مكفيها وتنبه عليهم انتي يابت يامنحرفة منك ليها اي واحدة ليها في الكار حتى لو مااعرفهاش تجرجروها معاكوا اناعاوزة رقص وانحراف للصبح ده فرح عديلة موش اي حد الهي يابعيدة يعدلوكي بدري

ده مشهد من مشاهد بتتكرر كل يوم واي فرح بنتعزم فيه ونروحه لازم ولابد من بنات الرقص والمياعة والا مايبقاش فرح والعروسة والعريس ان سابوا خشبة المسرح وقعدوا ليلتهم موش معدية على خير يلاقوا اللي بيجرجرهم للرقص تاني واصبح من العيب جدا ومايصحش يبقى فرح من غير رقص ومسخرة
لا والانقح تلاقي البنت هاتك ياهز ورقص ولما واحد يرملها كلمة تروح راقعة بالصوت والحقني ياواد يا شنكح يااخويا اخويا الله يحرقك انتي وهوا في فرن واحد يابعيدة قال يعني اخوها سايبها بترقص على اساس يعني انه اللي حواليها والشباب صمن بكمن عمين وهوا الوحيد اللي موش عمين
ولا تلاقي عمت العروسة حتة عظمة في قفة وتقولها وحياتك يابت داانا نادراها ان يوم فرحك لارقصلك رقصة زوبة بالزنوبة نادراها ياولية قال نادرة روحي ياشيخة الهي مايحرمك ولا يفضحلك بنتك نادرة دي اول مرة اعرف ان الولاية بيندروا ربنا بالرقص انا اعرف اللي بيندر ده بيندر في الخير والحسنات حايدبح عجل ويفرقه عالغلابة حايطبع مصاحف على حسابه ويحطها في الجوامع
يخربيتك ياام نادرة عالندر اللي يرميكي في جهنم وبئس المصير
هوا المسالة بقت انعدام اخلاق وقيم وجراة وانعدام التربية اذا كان الام ولا الجدة طالعة ترقص وتشخلل اصلها نادرة وحرام ماتوفيهوش لاينزل عليها غضب ربنا
والاب يبقى قاعد واخواته كلهم وبيتفرجوا على بنتهم وهيا هاتك يارقص ومبسوطين وبيقولوا البت كبرت وبقت عفريتة عفريت اما يعفرتك ياشيخ فين غيرة الاهل والاب على بنته والاخ على اخته ولا هيا خلاص بقت بزرميطة ولما البنت يحصلها حاجة الدنيا تقوم وتتقلب طب ربوا بناتكم الاول وعلموهم الاخلاق والدين وبعدين اقلبوا الدنيا
د انا بابا في فرحي قام زعق للعيال زمايلي عشان عاملين دايرة وبيسقفوا بس والكل حلف بالفرح برغم انه من غير رقص وربنا فتحها على كتير منهم من ساعة اليوم ده ماكانش فرح اسلامي بس كان من غير رقص ومسخرة ولما سمع ان عمتي عاوزة ترقص في الفرح راح قيلها اياكي تحضريه قالتله خلاص حاسقف وانا قاعدة في مكاني
بجد ظاهرة مستفزة
واذا كان ربنا حرم على البنت ترقص قدام ابن خالتها ومحارمها مابالك باللي بترقص قدام الغفر الغفير من البشر
وانتا كشاب معقولة اخلاقك تخليك تبص للبنت دي نظرة محترمة او تفكر انها تصلح للجواز واي بنت بتغير على دينها وعلى اخواتها البنات ممكن تسمح بده يحصل في فرحها وتبقى مبسوطة
رايكوا انتوا ايه يا مزيكاوية

للمزيد من مواضيعي

 

[bikky]

حبيبة قلبى رونى اخيرا نزلتى موضوع
بالنسبة لموضوع الرقص ده والحبشتكانات اللى بيعملوها فى الافراح اليومين دول
الافراح حاجة غريبة كله على بعضه والشباب ماتعرفهمش من البنات وهيصة طبعا ع المسرح محدش عارف العريس والعروسة مين من اللمة اللى حواليهم
وبصراحة يعنى البنات اللى بيرحو يرقصوا وعاملين فيها فيفى عبده فاكرين نفسهم بقى ان العريس هيجلهم من تنطيطهم والرقص اللى بيعملوه
مفيش مانع اننا نفرح وننبسط بس فى الحدود خصوصا اننا بنات يعنى
وميرسى ليكى يا رونى على الموضوع ده

 

[A.H.M.A.D]

السلام عليكم جميعاً

ازيك يا ام نور عامله ايه ؟؟ ياارب تكونى بخير ..

بصر احة يا ام نور كلامك كله 10/10 و كله صحيح و بيحصل كده فعلاً فى الأفراح و بالأخص فى الأماكن الشعبية و المناطق العشوائية التى ليس لها مبادئ ولا لها اى اهتمام بالشرع ولا بالدين ولا بالأسلام و هما كل همهم انهم يقضوا ليله كويسه و يظبطوا الدماغ على الاخر و يروقوا المسائل و بعد كده بقى مابيفكروش ايه اللى ممكن يحصل و اعتقد ان جهل الناس دى هو اساس اللي بيحصل ده ..

و اظن لما يكون فى بنات فى مناطق زى دى يبقى من السهل ان كل الكلام ده يحصل و مفيش فيه اى مشاكل خالص و كمان ممكن تلاقى اهل البنت هما اللى بيشجعوها على انها ترقص فى فرح صاحبتها او فرح واحده جارتهم على اساس انها موجبه معاهم بقى و ان الرقصه دى تعتبر نقوط و هاتطردلها لما تتجوز و فعلاً انا مرة حضرت فرح فى منطقه بالشكل ده و ياريتنى ما حضرته كان بصراحة اخر مسخرة و اخر قله ادب و مفيش اى نوع من انواع الرقابه على المناطق اللي زى دى .. و ياريت المناطق دى كانت تلاقى اهتمام من اى مسئول او من اى جهه حكومية و الله مكان ده بقى حالهم و ماكناش هانلاقى الناس دى بقت كده .. بس للأسف كل الأهتمام بالأماكن الخارجيه و ليست الداخليه ..

وطبعاً لما تبقى منطقه زى دى من غير رقابه و من غير اى حاكم او من غير اى حد يقولهم ده صح او ده غلط او يفهمهم دينهم او ايه معنى كلمه انت مسلم .. لكن للأسف مفيش و ده سبب من الأسباب اللى خليتهم يبقوا كده .. بقوا معتش فارقه معاهم اى حاجه اخته امه مراته او مين حتى المهم عنده انه يمتع اصحابه و هو كمان يظبط الطاسه و يروق المزاج و بعد كده بقى لما يبقى يفوق من الهباب الى هو بيشربه يبقى يشوف بقى اللى كان بيحصل و قال ايه يبتدى يراجع نفسه و يعمل نفسه انه خايف على اهل بيته .. و الله يا ام نور مهما اتكلمنا فى الموضوع ده مش هانديه حقه و مهما اتكلمنا مش هانخلص كلام فيه .. و ربنا يسترها معانا و علينا و على بناتنا و اهلنا جميعاً يااارب ...
و بجد يا ام نور موضوع تحفه و هااااااااايل موووت .. تسلم ايدك بجد ..
اها صحيح نسيت اقولك .. تم التثبيت

 

[Gowa.ALpi]

بينى وبينك انا مش برجح موضوع الافراح اصلا يعنى قاعه وفرقة ولا دى جى ومعازيم ومصاريف
طيب ما انا بالمصاريف دى ممكن اجيب مثلا عجلين او تلاته ويدبحوا ونطعم مساكين وطبعا الاهل والاصحاب ولاقرايب وكده
يعنى انا حاسس ان كده هيبقى احسن وبالباقى مثلا ممكن العروسين يروح يقضوا كام يوم فى مكان كويس شرم او الغردقة
احسن من الرق والمسخرة والكلام الفارغ
بجد موضوع هايل ووحلو أوى تسلم ايدك

 

[Not To Be]

الفاضى يعمل اكتر من كدة

 

[أكرم صبرى]

نور نودة ..
واخيرا الواحد شاف لك توبيك قبل ما يطلع معاش ..
ورجعة للمنتدى بتوبيك جامد جدا
بداية يا سيدة المنتدى عايزين نقول إن الناس عايزة تفرح بالطريقة التى تعودت عليها ..
وما بتصدق الناس أى فرصة علشان تنفس فيها ن رغبتها دي ..
لكن يبقى الطريقة هل هى طريقة مشروعة ولا لأ ؟! ..
وطبعا لا يجادل أى حد إن كل أو أغلب الافراح الموجودة حاليا مليانة مخالفات للركب..
ولا يجادل فى ده إلا واحد عايز يجادل وخلاص ..
وإحنا شنفا كل الحاجات اللى قولتي عليها دى إن واحدة تقوم و( تهز ) شوية ..
والاكتر من كده الفساتين العريانة سواء كان من بعض المعازيم أو من العروسة نفسها ..
وفيه بنات محجبات تلاقيهم للاسف بيقلعوا الحجاب فى الفرح وينقعوا فستان شفتشي ..
وحجتهم طبعا فى ده إن دى ( ليلة العمر ) وهى ليلة تفوت ولا حد يموت ..
بصي يا رانيا إحنا عارفين إن كل ده غلط ..
والحاجات دى موش حتنتهي بمجرد إننا نقول ان ده غلط ..
والناس نفسها عارفه إن ده غلط ...
لكن محدش حيبطل يحتفل بالطريقة دي ..عارفه ليه ؟!
لأن العري والاختلاط فى الافراح هو حلقة فى سلسلة طويلة من المخالفات ..
كل لما تسحبي حلقة تقعي فى حلقة غيرها وهكذا ..
وبالتالى انتى موش حتقدري تفصلي حلقة من السلسلة وخصوصا لو كانت الحلقة دى فى منتصف السلسلة ..
والحل يكون إننا نبدأ بأول السلسلة ..
وهنا مربط الفرس ..
إن لازم الدين يدخل فى حياة الناس بشكل أكبر ..
إنتى عارفه ان أغلب الشباب لا تربطة بالصلاة إلا صلاة يوم الجمعة ..
وفيه إلا موش بيصليها أساسا ..
إزاي يكون واحد موش بيصلى وموش بيقرأ قرأن نيجى نقوله إعمل فرح إسلامي ..
هو موش حيستوعبها ..
وحيشوفها تقل دم ..
لكن هو إلتزم فى نفسه حتلاقيه بيسأل تلاقى هو الفرح الصحيح اللى يرضي ربنا إيه ؟!
وهكذا ..
الناس محتاجة إصلاح من جوه ..
لما يحصل ده ..
حنلاقي كل الظواهر دي إختفت
تماما
وشكرا يا نور نودة على التوبكي القنبلة
وبلاش تكتبي توبيك كل فين وفين سيبك با÷ من ( زروني كل سنة مرة )
وإعمللنا توبيكات متتابعة
وسلامي للبت ندي
والواد نور .

 

[Reda_Love4Ever]

شكـــــــرا يا أم نور أخيرا رجعتلنا بمواضيعك المهمه تانــــــــــــــــى انتى بتناقشى قضيه مهمه جدا يمكن البعض مش واخد باله منها بس صحيح ازاى يعنى أب يسيب بنته ترقص ادام الاف من الشباب والرجال ولا الفرح ده حاله خاصه لأ دنا أعرف شباب بيروحوا ظأفراح علشان البنات اللى فيه واللى هيرقصوا مع انهم مش يعرفوا حد فى الفرح
وشكـــــرا تانى على الموضووووووع الهاااااااااااااايل ده

 

[نور & نودة]

حبيبة قلبى رونى اخيرا نزلتى موضوع
بالنسبة لموضوع الرقص ده والحبشتكانات اللى بيعملوها فى الافراح اليومين دول
الافراح حاجة غريبة كله على بعضه والشباب ماتعرفهمش من البنات وهيصة طبعا ع المسرح محدش عارف العريس والعروسة مين من اللمة اللى حواليهم
وبصراحة يعنى البنات اللى بيرحو يرقصوا وعاملين فيها فيفى عبده فاكرين نفسهم بقى ان العريس هيجلهم من تنطيطهم والرقص اللى بيعملوه
مفيش مانع اننا نفرح وننبسط بس فى الحدود خصوصا اننا بنات يعنى
وميرسى ليكى يا رونى على الموضوع ده

ايوشتي حبيبتي شفتي بقى اخيرا يابنتي نزلت موضوع ماانتي عارفة بقى وقتي بالماني والماني يكسب لا بهزر طبعا بلا ماني بلا فاني كل الموضوع انه وقتي كان ضيق فعلا وحاجات كتير كنت عاوزة اتكلم فيها ولقيتها وانا عشان اكتب حاجة لازم يبقى وليد موقف وفي ساعتها وانا متاثرة بيه ومايكونش في نفس الوقت مكرر واتكلمنا فيه قبل كدة
والله يابيكي اخر مسخرة وضياع ومنظر يسد النفس ويكره الواحد في الناس المنفسنة دي
واللي عاملين فيها فيفي عبده في اعتقادي فعلا متصورين انهم حايغووا ولا يرموا طعم لصيدة من الشباب يعني اكيد الشباب اللي شافوها حايحاولو يوصلولها ويعلقوها مثلما تعلق الذبيحة وتتشفى
ميرسي ليكي يا ايوشتي على مرورك الجميل ورايك الاجمل ربنا يحفظك ويحميكي يارب واوعي تنسي كلمتي انتي بالذات لانك عارفه ليه؟

ازيك يا ام نور عامله ايه ؟؟ ياارب تكونى بخير ..

بصر احة يا ام نور كلامك كله 10/10 و كله صحيح و بيحصل كده فعلاً فى الأفراح و بالأخص فى الأماكن الشعبية و المناطق العشوائية التى ليس لها مبادئ ولا لها اى اهتمام بالشرع ولا بالدين ولا بالأسلام و هما كل همهم انهم يقضوا ليله كويسه و يظبطوا الدماغ على الاخر و يروقوا المسائل و بعد كده بقى مابيفكروش ايه اللى ممكن يحصل و اعتقد ان جهل الناس دى هو اساس اللي بيحصل ده ..

الحمد لله على كل خير سالت عليك العافية يااحمد
هوا كلامك صح بالاخص في المناطق الشعبية وبيبقى موش رقص وبس لا وشرب وشيشة وحاجة اخر سطلنة بس يااحمد انتا اكيد حظرتك افراح للناس الراقية وشفت برضه اللي بيحصل فيها
ده البنات في الافراح الراقية على افضع تلاقي ييج عشرين بنت وكلهم لابسين اخر موضة واللي لابساه لايستر ولا نيلة وماشين طابور ورا بعض وهاتك يارقص مع العروسة وفي البوفيه تلاقيهم مركزين انهم يتزنقوا بمنظرهم البشع على الشباب وحركات ال اووف لالاه بليز يااستاذ والرقة بقى
قول اهم في المناطق الشعبية بتبقى البنات محجبة ولابسة ضيق وبترقص ودة اسوا شيء انها ماحترمتش حجابها ودينها لكن دول الطبقى الهاي اصلا كدة كدة في الضياع موش كلهم بس اغلبيتهم المادة وغياب الاسرة مدينهم فرصة الحرية الضياعية

و بجد يا ام نور موضوع تحفه و هااااااااايل موووت .. تسلم ايدك بجد ..
اها صحيح نسيت اقولك .. تم التثبيت

تسلم يااحمد بجد الحمد لله
يعني ياعم نسيت تقول الخية وبتضحك كمان طب ياعم تشكرات افندم ده على اساس اني خارج نطاق الخدمة ماشي مردودالك ان شاء الله
وشكرا لمرورك وتعليقك الجميل

 

[القناص تيتو]

فعلا موضوع مهم جدا وظاهره بقت منتشره بطرقه فظيعه ف كل حته سواء عشوائى ولا راقى ولا حتى متوسط بجد حاجه مبقتش ظريفه خالص
موضوع هايل يا نور ومش هزود على اللى المحترمين قالوه فوق لانهم جابوا كل حاجه

 

[Gloming]

نور ونوده ....بجد موضوع جميل جدا ....

وللاسف الحكايه ده بقت عاده فى المجتمعات اللى احنا فيها تصدقى لو اقولك انا لما بلاقى نور على بيت من البيوت ومش بلاقى صوت الدى جى جنب النور ....لان خلاص العاجى والمعتاد ان تلاقى المسخره اللى بتتسمى فرح او فرحه

واللى بقى عادى برضه ان تلاقى البنات ذى ما احمد واكرم قالوا بيخلعوا برقع الحياء على اساس ان الفرح ده فرصه للجواز.....اى بنى ادم محترم ممكن يرتبط بواحده خلتع وعرت نفسها ادامه ماهو ذى ماعملت كده معاه عملت مع غيره ...لكن تقولى ايه للعقول المريضه
ومش هاقولك ان فكره الفرح نفسها مرفوضه لا طبعا انا اول واحده ان شاء الله هاعمل فرح بس مش لدرجه الخلاعه والاشمئزاز والمسخره والقاعده اللى بتبقى عباره عن رقص ومسخره فقط

ومع غياب الاهل اللى بقى عادى وان خلاص الاب والام ممكن يرموا بنتهم لاى حد سواء كويس ولا لا هى اللى خلت الحال يوصل للوضع المؤسف ده ......انا عايزه اقولك ان فى واحده صحبتى هتتجوز الشهر اللى جاى ولما كلمتنى بتقولى انا عايزاكى تلبسى سواريه علشان تخرجى من الفرح ده بعريس .....خلاص بقت الحكايه ده مترسخه فى العقول ...لان طبعا كتير بنلاقى ولد رايح يخطب واحده بيقولك انا شفتها فى فرح ما شاء الله عليك .... فعلا احسنت الاختيار بس هنعمل ايه اذا كان زمانا ده ماشى غلط واحنا كمان ماشيين غلط وبرضه هاقولك ان الدين هو الاساس ولما مفيش اساس والعياذ بالله خلاص مش هنقدر نلوم على حد ....... الحياء بضعه من الايمان

باشكرك لتانى مره على الموضوع الجميل ده وبصراحه كل كتاباتك وردودك بتعجبنى تسلم ايديكى .....منتظرين المزيد منك