العودة   منتديات مزيكا تو داى > المنتديات العامة > المنتدى الأدبي > الشعر

الشعر You can share your favorite poems .. شعـّـر

إضافة رد
 
أدوات الموضوع إبحث في الموضوع انواع عرض الموضوع
قديم 14-02-2009, 06:07 PM   #1
S!Lent LoVe
عضو مزيكاوي
 
الصورة الرمزية S!Lent LoVe
 
تاريخ التسجيل: Jan 2009
الدولة: ṠḷḶἑИ₵ἑ ὥỐЯḶԃ
المشاركات: 868
إرسال رسالة عبر MSN إلى S!Lent LoVe إرسال رسالة عبر Yahoo إلى S!Lent LoVe
Post موهوب في كتابه الاغنيه .. عايز تعرف ايه هي مكونات الاغنيه العاميه .. وازاي بتتكتب الاغنيه >> ادخل هنــــا

 

موهوب كتابه الاغنيه عايز تعرف

عايز تعرف ايه هي مكونات الاغنيه؟
عندك موهبه الكتابه بس مش عارف ازاي تكتب اغنيه موزونه..!!
كل ذلك
حصريـــــــــا ولأول مره على جميع المنتديــــات

مع
S!Lent LoVe

فقط على
شبكه مزيكا اليوم
MaZiKa2daY



حبايبي اعضاء منتدانا العزيز مزيكا توداي
بدايهً الموضوع كله الحمد لله من اجتهادي وليس منقول من اي منتدى آخر

والموضوع بيتكلم عن نوع من انواع الشعر العامي وهو الشعر الغنائي

الاغنيه مش زي ماناس كتير فاهمه انها موضوع سهل وان اي حد يكتب كلام حلو ولايق مع بعضه وليه قافيه يبقه كتب اغنيه لالا طبعا انا كمان كنت واحد من الناس اللي فاهمه كدا
كنت زي اي حد بيكتب الكلام اللي بيحسه جواه وطبيعي مبيكونش موزون وبقول انا كتبت اغنيه بس بعد كدا عرفت ان دي متتسماش اغنيه لان الاغنيه ليها قواعد واصول في كتابتها فحبيت اني اكتب الموضوع دا بجد لكل حد عنده الموهبه لكتابه الاغنيه بس فيه حاجات ممكن ميكونش يعرفها او مش واخد باله منها
علشان نوصل كلنا الى مرحله الاحتراف
معا باذن الله

يلا نبدأ مع بعض

اول حاجه خااااالص هنتكلم عليها ايه هي مكونات الاغنيه؟
او باللغه العربيه الفصحى
ماهي مكونات الاغنيه؟
هتقولي خلينا بالعامي احسن وخلي البساط احمدي داحنا حتى بنتكلم عن الاغنيه العاميه هقولك ماشي موهوب كتابه الاغنيه عايز تعرف

بص ياسيدي قبل منقول ايه هي مكونات الاغنيه او عناصر الاغنيه هنعرف مصطلحات بسيطه كدا مصطلحات كلنا عارفنها وكلنا درسناها قبل كدا



اول حاجه هي
القافيه

وهي الكلمه اللي بينتهي بيها البيت الشعري في شعر الفصحي
ولكن الأغنيه العاميه تختلف طبعا عن شعر الفصحى لانها لا بتتكون من بيوت ولا من شبابيك لا هي بتتكون من شطرات كل شطره بتنتهي بقافيه

والقافيه ممكن تكون متشابهه في حرف زي (قلبي,جرحي,همشي)
او متشابهه في حرفين زي (ربي,حبي,قلبي,ذنبي)
او تلت حروف زي (عيد,بعيد,سعيد)
او اربع حروف زي (راسي,حراسي,نبراسي) وهكذا....

وطبعا كل مازادت عدد الحروف المتشابهه في القافيه كل ماكان اصعب في انك تلاقي كلمات بنفس القافيه

تاني حاجه هي
الشطره او الشطر

في الشعر الفصحى هي تعتبر نص (نصف) البيت الشعري ولكن زي متفقنا ان الاغنيه العاميه مبتتكونش من بيوت
يبقه نقدر نعرف الشطره في الشعر العامي بانها
هي كلمات متناسقه مع بعضها تكون جمله مفيده موزونه ذات معنى مفهوم تنتهي بقافيه موزونه (تعريفي الشخصي وقابل للتعديل طبعا)

تالت حاجه معانا هو
الوزن

الوزن في الاغنيه العاميه هو وزن للشطرات عموما ووزن للقافيات

اول حاجه وزن الشطرات ان يكون الشطرات المتوازيه اللي بقافيه واحده تكون موزونه
يعني لما تقراها تحس انهم ماشيين مع بعض وتحس بنغمه كدا وانت بتقراهم
تاني حاجه وهي وزن القافيه يعني كل الشطرات اللي بقافيه واحده لازم تكون القفيات دي كلها متشابهه في حروف او على وزن واحد

وحكايه الوزن دي هنشرحها اكتر وبالتفصيل في الاخر خليكو معايه بس


ندي مثال للكلام اللي فات دا

اغنيه حبيبه قلبي اصاله (أوقات)

أوقات بخاف فيها وانا لوحدي . وحاجات تجيب فخيالي وتودي

هنا زي ماحنا شايفين في جملتين بينهم نقطه كل جمله من دول تعتبر شطره
وكل شطره بتنتهي بقافيه موزونه وهم الكلمتين اللي تحتهم خط (لوحدي , وتودي)
والقافيه هنا زي ماحنا شايفين مشتركه في حرفين (د , ي)


نيجي بقه للب الموضوع وهو ايه هي مكونات او العناصر الاساسيه للاغنيه ؟!!

بص ياسيدي وركز معايه
الاغنيه بتتكون من (3) عناصر اساسيه


1-المذهب

2-السينيو

3-الكوبليه


1- المذهب : بيتكون من عدد من الشطرات وهو بكل بساطه الكلمات اللي بتبتدي بيها الاغنيه فدا طبعاااااا يعتبر اهم جزء في الاغنيه لان هو دا اللي اول ماهتسمعه هتقرر اذا كنت هتكمل سماع الاغنيه ولا هتقول ياعم فكك منها وشوف غيرها !!!
يعني لازم تكون كلمات المذهب كلمات تشد المستمع ولازم تكون بتحكي على الاقل نص (قصه او فكره او موضوع) الاغنيه
وفي اغاني ممكن نلاقيها من غير مذهب يعني نلاقيها بتبدا بالسينيو على طول زي مثلا اغنيه تامر (اعتزري) هنلاقيها بدات بالسينيو على طول من غير مذهب وهنا بيكون السينيو هو المذهب

2- السينيو : هو اللي غالبا بيجي بعد المذهب وهو الجزء اللي فكل الاغاني تقريبا بيتعاد كذا مره بعد كل كوبليه والجزء دا اللي غالبا بيعلق مع ودن المستمع للاغنيه لانه بيتعاد كذا مره

3- الكوبليه : بيعتبر هو قلب وعصب الأغنيه لانه بيعتبر هو اللي بيشمل على معظم قصه او فكره الاغنيه والأغنيه ممكن تحتوي على كذا كوبليه

نجيب مثال نوضح فيه كل جزء من دول
اغنيه تامر حسني (قرب كمان)


وانا جنبك حبيبي بجد مش عارف اقولك ايه . معاك الوقت بيعدي محسش بيه
واي كلام هيوصف ايه فلحظه بعيشها وانا وياك . كفايه عليا تبقى فحضني وابقى معاك

قرب كمان من حضني وحس باللي بحس بيه . دانا من زمان مستني اعيش وياك اللحظه دي
ياحبيبي قول بحبك وانا اقولها معاك


حبيبي يفوت سنين وايام على حبك في قلبي يزيد . كاني بعيش من الاول فحب جديد
بعدت كتير وحضنك عنه مهما بعدت برجع ليه . وقلبي يدوب فاحساسه اللي عايش فيه


قرب كمان من حضني وحس باللي بحس بيه . دانا من زمان مستني اعيش وياك اللحظه دي
ياحبيبي قول بحبك وانا اقولها معاك


زي ماحنا شايفين اول جزء اللي باللون الاخضر دا هو المذهب
وتاني جزء اللي باللون الاحمر دا السينيو اللي بيتعاد كذا مره في الاغنيه
والجزء التالت اللي باللون الازرق دا الكوبليه
وبيجي بعده السينيو وبعده الكوبليه التاني وهكذا .... لحد اخر الاغنيه اللي غالبا ما بتنتهي بالسينيو


لحد هنا خلص الكلام عن مكونات الاغنيه نيجي بقه للجزء التاني في موضوعنا وهو خاص اكتر بالناس اللي عندها موهبه كتابه الاغنيه
ودا اللي هنشوفه مع بعض باذن الله

تابعونااااااااا بعد الفاااااااااصل




موهوب كتابه الاغنيه عايز تعرف





للموهوبين فقط


طبعا زي ماعرفنا ان الاغنيه بتتكون من مذهب وسينيو وكوبليه
طب ازاي بقه بتتكتب الحاجات دي
بص ياسيدي كل جزء من اجزاء الاغنيه سواء كان المذهب او السينيو او الكوبليه بيتكتب بنظام معين زي القوالب (تعبيري الشخصي) هتقولي ازاي هقولك يعني مثلا لما بيجو يصنعو الطوب ازاي بيطلعوه في شكله دا بيحطوه في قوالب وهي اللي بطلعه فشكله دا هتقولي ايه اللي دخل الطوب في الاغنيه دلوقتي (وشكلي هتحدف بالطوب في الاخر موهوب كتابه الاغنيه عايز تعرف)
هقولك الاغنيه كمان ليها قوالب بنحط فيها كلمانا علشان يطلع منسق وموزون بس طبعا قوالب الاغنيه مش قانون لازم نمشي عليه ومش قالب ولا اتنين ولا عشره لا دول كتير جدااااااااااااا وكل شويه بتظهر قوالب جديده

بس علشان احنا لسه موصلناش لدرجه اننا نخترع قوالب جديده فهنا هحطلكو بعض القوالب اللي ممكن نعمل زيها او نمشي عليها مع تغيير الكلمات والمعنى طبعا هي مجرد قوالب هتصب فيها كلامك علشان يطلع بشكل منسق وحلو ممكن يتسمى اغنيه
يلا رغيت كتير انا عارف ندخل بقه على بعض انواع القوالب دي , طبعا مش هقدر اقولها كلها لانها زي ماقولنا كتير جدااااااااااااااااااااااا


اول نوع معانا وهو النوع التقليدي والغالب في كتابه المذهب
وهو بيتكون من (4) شطرات بتكون الشطره (الاولى و التالته) بقافيه واحده
والشطره (التانيه و الرابعه) بقافيه اخرى

زي مثلا اغنيه ايساف (فضلتك)

فضلتلك على كل الناس . وياما تعبت واستنيت
حلفت اثبت لكل الناس . اني هلاقي لو ضحيت

زي ماحنا شايفين ان الشطره الاولى والشطره التالته اللي باللون الازرق بقافيه واحده وهي (ناس)
والشطره التانيه والرابعه اللي باللون الاحمر بقافيه على وزن واحد وهي (استنيت , ضحيت)

وده رسم توضيحي معانا علشان نوضح اكتر الكلام اللي فوق

_______ , _______
_______ , _______

اللي بالازرق دا الشطر الاول والتالت اللي بقافيه واحده
واللي بالاحمر الشطر التاني والرابع اللي بقافيه اخرى

او مثال تاني زي اغنيه يارا (انت مني)

انا سبتك وانت مني . ندمانه للنهرده
لو حتى غصب عني . مكنش لازم ارضى

_______ , _______
_______ , _______


وممكن النوع دا يزيد شطرتين او اكتر او ينقص شطرتين

يعني مثلا ممكن يزيد شطرتين يعني يبقه (6) شطرات وبكدا هيكون الشطره (الاولى , التالته , الخامسه) قافيتهم متشابهه
والشطره (التانيه , الرابعه , السادسه) قافيتهم متشابهه

وده مثلا زي اغنيه رامي جمال (تعرف)

تعرف بس تجرح قلبي . وتعذبني بيه
انما يوم تحس بجرحي . داللي ملكش فيه
مش هخاف مالبعد همشي . يعني هيجرى ايه

_______ , _______
_______ , _______
_______ , _______


او ممكن زي ماقولنا انه ينقص شطرتين وبكدا هيكون شطرتين بس والشطرتين ليهم نفس القافيه ودا غالبا .. غالبا بيتكتب بيه المذهب


ودا مثلا زي اغنيه تامر حسني الروعه (افتكرلي)

افتكرلي اي حاجه كانت حلوه مني
مش هجرح تاني قلبك حبيبي خلاص سامحني



او فيه نوع كمان شايع جدا برضه
وهو بيتكون من (6) شطرات الشطره (الاولى و التانيه)و(الرابعه و الخامسه) بقافيه واحده (او بقافيه مختلفه) والشطره (التالته و السادسه) بقافيه تانيه

نوضح اكتر بمثال

زي مثلا اغنيه تامر حسني (عرفت اللي فيها)

عرفت اللي فيها , عينيه بان عليها
ياقلبي انه محبنيش
حاجات عيشنا فيها . وعشمني بيها
واخرتها ايه طلعت مفيش

_______ , _______
_______
_______ , _______
_______


او ممكن قافيه الشطره (الاولى و التانيه)و(الرابعه و الخامسه) يكونو بقافيه مختلفه ودا مثلا زي

اغنيه عامر منيب (اوصف ايه)

انا قلبي وروحي ملك ايديك . وعمري بعيشه ليك
لو حتى عني بعيد
ومنايا دايما اكون معاك . دا يوم عن يوم هواك
جوايه عمال بيزيد

_______ , _______
_______
_______ , _______
_______



فيه بقه نوع ودا مختلف شويه وجديد وانا عن نفسي بحبه جدا لان الاغاني اللي اتعملت بيه كلها نجحت جدا لحد دلوقتي وعجبت الناس كلها
النوع دا انا بسميه (sandwich) السندويتش (تعبيري الشخصي)
وهو بيتكون من (4) شطرات بتكون الشطره (الاولى و الرابعه) بقافيه واحده وبينهم الشطره (التانيه و التالته) بقافيه تانيه
زي السندويتش يعني

زي مثلا اغنيه حماقي (مش كنت تتكلم)

مش كنت تتكلم . شايفني بسيب ايديك وبضيع . ناديني وقولي ليه بتبيع . لو غلطه هتعلم
ازاي كدا هنرجع . هوانا معدش زي زمان . وفين يجمعنا تاني مكان . الفرقه دي بتوجع

_______ , _______ , _______ , _______

_______ , _______ , _______ , _______

زي ماشوفنا هو عمل اسلوب السندويتش بس مرتين ورا بعض وممكن الاكتفاء بمره واحده

زي اغنيه اصاله (انا بس بدايق)


انا بس بدايق , علشان بشوف فعنيك , نظره صعبانه عليك , وعليك دا مش لايق


فيه بقه حاجات شواذ زي مثلا وجود شطرتين او اكثر مختلفين وكل شطره من الشطرات يقابلها شطره بنفس قفيتها

زي اغنيه هيثم شاكر (بفكر فيك)

لو كنت حقيقي ناوي . تبعد وتعيش لوحدك . طب كان قلبك يقولي . انك بايع هواك
لو تبعد مين يداوي . كل اللي قسيته منك . وياريت قلبك يقولي . ضيعني ليه معاك

_______ , _______ , _______ , _______

_______
, _______ , _______ , _______

هنا زي ما شوفنا اربع شطرات بقافيات مختلفه بيقابلهم اربع شطرات تانيين كل شطره منهم بتقابل شطره من الشطرات اللي فوق وبتكون بنفس قفيتها


ودي قوالب تانيه مع الامثله والرسم التوضيحي


وبحبك وحشتيني . بحبك وانتي نور عيني . دا وانتي مطلعه عيني
بحبك موت
لفيت قد ايه لفيت . ما لقيت غير فحضنك بيت . وبقولك انا حنيت
بعلو صوت

_______ , _______ , _______
_______
_______ , _______ , _______
_______


قالو ياما ان القمر عالي وبعيد . والملايكه مستحيل تلمسها ايد
وانا الليله ديا . كل دا فاديا . يمكن في الدنيادي اكون انا الوحيد

_______ , _______
___ , ___ , _______


وانا جنبك حبيبي بجد مش عارف اقولك ايه . معاك الوقت بيعدي محسش بيه
واي كلام هيوصف ايه فلحظه بعيشها وانا وياك . كفايه تبقى فحضني وابقى معاك

_______ , _______
_______ , _______


داليوم بيعدي فبعدك عني بالف سنه . بقه خوفي عليك اكتر من خوفي عليا انا
من امته شوف من قد ايه وانا مش انا

_______ , _______ , _______


اخترنا ليه اصعب طريق ومشينا فيه . ليه مدناش انا وانت فرصه لبعض ليه
دلوقتي جي بتقولي نرجع للكان . واحنا اللي كان علشان نصونه عملنا ايه

_______ , _______
_______ , _______



مش هطول عليكو اكتر من كدا في اشكال القوالب لانها كتير جداااااااا زي ماقولنا وكل شويه طبعا بيطلع جديد والدور عليك انت بقه دلوقتي شغل مجموعه اغاني وشوف القوالب بتاعتها وضفها عندك واعمل عليها

ودلوقتي هنبتدي نقول شويه ملاحظات مهمه جدا ياريت ناخد بالنا منها واحنا بنكتب
تابعوناااااا



1- طبعا مهم جدا ان تكون عدد كلمات كل شطره نفس عدد الشطره اللي بنفس قفيتها تقريبا او قريب من العدد علشان تكون موزونه
طبعا برضه هرجع اقول دا مش قانون لان فيه كلمات بتركب على لحن معين ودا طبعا ممكن يزود او ينقص الكلمات على حسب اللحن (دا مثلا يعني)
وممكن يكون الشطرات مش نفس عدد الكلمات بس لما نقراها نحس انها ماشيه مع بعضها ومفيهاش اي كسور


2- في حاجه اسمها كسور في الشعر عموما سواء عامي او فصحى وفي الاغنيه برضه , ايه هي الكسور دي الكسور هي انك تكون كاتب كلام حلو وممكن يكون نفس عدد الكلمات بس تحس انه مش ماشي مع بعضه ومش موزون وانت ممكن تعرف الاغنيه اللي انت كاتبها دي فيها كسور ولا لا عن طريق انك مثلا لو هتشوف الكسور دي في شطرتين ورا بعض هتكتب الشطرتين تحت بعض لازم يكون مقاسهم واحد في الكتابه تقريبا او نفس عدد الكلمات تقريبا برضه بعد ماتكتبهم ابدا اقرا بقه اللي انت كتبته لو حسيت انك بتقراهم عادي والكلام ماشي مع بعضه يبقه مفيش كسور لكن لو حسيت انها تقيله او حسيت ان في كلام بيقف معاك في النص كدا يبقه مش موزونه ومحتاجه تعديل تاني لحد ماتظبط معاك وتحس بنغمه كدا وانت بتقراهم والحكايه دي طبعا بتيجي بالممارسه


3- من المستحب ان الاغنيه تتكتب كلها بقافيات على نفس الوزن يعني تكون قافيه المذهب وقافيه السينيو وقافيه الكوبليهات على وزن واحد
زي مثلا اغنيه تامر (مكنتش مبين) شغلها كدا

هتلاقي دي كلمات القافيه في الاغنيه كلها
قافيه المذهب (تمثيل,سنين)
وقافيه السينيو (كتير)
وقافيه الكوبليهات (كبير,فيه,مكفيه,فيه)

هتلاقي القافيه فكل الاغنيه في المذهب والسينيو والكوبليه مش متطابقه بس على نفس الوزن ودا من المستحب لكن مش شرط


4- لازم ولابد ميكونش المذهب والسينيو والكوبليه مكتوبين بقالب واحد لا لازم التغيير في الاغنيه يعني مثلا نكتب المذهب بقالب ونكتب السينيو بقالب تاني وكذلك الكوبليه بقالب تالت وبكدا يكون في تنويع في الاغنيه

بكدا اكون انتهيت من الشرح



وفي النهايه ارجو تكون الناس كلها استفادت من الموضوع
وسامحوني لو غلط فاي حاجه
مستني تعليقاتكو واللي شايف اي اخطاء في الموضوع أو عنده اي اضافات ياريت يقولها طبعا علشان نستفاد كلنا


تحياتي



ẄᴁḼ

S!Lent LoVe



اكمـــال للموضوع

للمزيد من مواضيعي

 




l,i,f td ;jhfi hghykdi >> uhd. juvt hdi id l;,khj hguhldi ,h.hd fjj;jf >> h]og ikJJJJh >> >> l,i,f l;,khj hghykdi hgauv hguhldi hgykhzn h]og hdi fjj;jf juvt j;jf uhd. ikJJJJh

 

 


__________________
NO CoooMenT

التعديل الأخير تم بواسطة Beauty Sandrine ; 10-06-2010 الساعة 08:21 PM.
S!Lent LoVe غير متواجد حالياً   رد مع اقتباس

 

 

 

قديم 14-02-2009, 07:30 PM   #2
AhMeD_MeZo2009
عضو مخالف
 
تاريخ التسجيل: Dec 2008
الدولة: لما اعرف هبائى اقولك
العمر: 25
المشاركات: 2,363
إرسال رسالة عبر MSN إلى AhMeD_MeZo2009 إرسال رسالة عبر Yahoo إلى AhMeD_MeZo2009 إرسال رسالة عبر Skype إلى AhMeD_MeZo2009
افتراضي

 

تسلم ياجامد

 

AhMeD_MeZo2009 غير متواجد حالياً   رد مع اقتباس

 

قديم 14-02-2009, 08:19 PM   #3
عمرو الغنيمى
عضو مزيكاوي
 
تاريخ التسجيل: Aug 2007
الدولة: الاسكندريه
العمر: 32
المشاركات: 762
إرسال رسالة عبر MSN إلى عمرو الغنيمى إرسال رسالة عبر Yahoo إلى عمرو الغنيمى
افتراضي

 

موضوع هايل سيلنت ويستاهل التثبيت

وعلى فكره انا فاهم الكلام دا كلوا لكن اكيد استفدت لما قريته تانى لان انا رحت اختبارات كتير

فالاذاعه والتليفزيون

وبكتب اغانى وبختارلها الطريقه اللى تتغنى بيها وكمان بغنيها

لان صوتى مش بطال
تسلم ايدك على الموضوع الهايل ده

 

__________________
عمرو الغنيمى
فراق دلوقتى من غير نار
بدل ما اتعب واعيش فى مرار
واتالم واتعذب بعدهم
عمرو الغنيمى غير متواجد حالياً   رد مع اقتباس

 

قديم 15-02-2009, 12:14 AM   #4
Hanen StorY
عضو مزيكاوي
 
الصورة الرمزية Hanen StorY
 
تاريخ التسجيل: Aug 2008
الدولة: جوه احلى مكان فى الكون والعالم المجنون مصر
المشاركات: 1,829
افتراضي

 

موضووع حلواوى يا سلينت وبجد هادف ومهم
وافادنى كتير وخصوصا انى بجد انا اول مرة اعرف يعنى ايه مذهب وسنيو وكوبليه
وكنت كمان لما حد يقول عنهم مكننتش ببقى فاهمه اوى شكرا ويارب دايما تزودنا بلمعلومات المفيدة

 

__________________
[IMG]http://i55.*******.com/i43jlv.jpg[/IMG]
Hanen StorY غير متواجد حالياً   رد مع اقتباس

 

قديم 15-02-2009, 04:35 PM   #5
MaZiKa_LoVeR
عضو مزيكاوي
 
الصورة الرمزية MaZiKa_LoVeR
 
تاريخ التسجيل: Jan 2009
الدولة: Mansoura & Alex
العمر: 31
المشاركات: 1,550
إرسال رسالة عبر MSN إلى MaZiKa_LoVeR إرسال رسالة عبر Yahoo إلى MaZiKa_LoVeR
افتراضي

 

لا بجد موضوع يجنن يا وائل
اتمنى ليك التوفقيق
مشكووووووور

 

__________________
[IMG]http://i46.*******.com/2emjzp2.gif[/IMG]
MaZiKa_LoVeR غير متواجد حالياً   رد مع اقتباس

 

قديم 15-02-2009, 10:12 PM   #6
S!Lent LoVe
عضو مزيكاوي
 
الصورة الرمزية S!Lent LoVe
 
تاريخ التسجيل: Jan 2009
الدولة: ṠḷḶἑИ₵ἑ ὥỐЯḶԃ
المشاركات: 868
إرسال رسالة عبر MSN إلى S!Lent LoVe إرسال رسالة عبر Yahoo إلى S!Lent LoVe
افتراضي

 

اقتباس:
المشاركة الأصلية كتبت بواسطة moha007 مشاهدة المشاركة
موضوع جميل بس ياريت تراسلني علي الميل دة [email protected] او [email protected] للضرورة
شكرا
تسلم عالمرور يا موحا وانا ضفت اميلك عندي


اقتباس:
المشاركة الأصلية كتبت بواسطة ahmed_mezo2009 مشاهدة المشاركة
تسلم ياجامد
شكرا على مرورك الجميل يا احمد


اقتباس:
المشاركة الأصلية كتبت بواسطة عمرو الغنيمى مشاهدة المشاركة
موضوع هايل سيلنت ويستاهل التثبيت

وعلى فكره انا فاهم الكلام دا كلوا لكن اكيد استفدت لما قريته تانى لان انا رحت اختبارات كتير

فالاذاعه والتليفزيون

وبكتب اغانى وبختارلها الطريقه اللى تتغنى بيها وكمان بغنيها

لان صوتى مش بطال
تسلم ايدك على الموضوع الهايل ده
منورني يا عمور

مبسوط ان الموضوع عجبك

وربنا يوفقك يارب

اقتباس:
المشاركة الأصلية كتبت بواسطة Hanen StorY مشاهدة المشاركة
موضووع حلواوى يا سلينت وبجد هادف ومهم
وافادنى كتير وخصوصا انى بجد انا اول مرة اعرف يعنى ايه مذهب وسنيو وكوبليه
وكنت كمان لما حد يقول عنهم مكننتش ببقى فاهمه اوى شكرا ويارب دايما تزودنا بلمعلومات المفيدة

مبسوط اوي يا حنين انك استفدتي بجد من الموضوع

وانا تحت امركو فاي سؤال او استفسار ان شاء الله


اقتباس:
المشاركة الأصلية كتبت بواسطة MaZiKa_LoVeR مشاهدة المشاركة
لا بجد موضوع يجنن يا وائل
اتمنى ليك التوفقيق
مشكووووووور
تسلم يا اسلام عالمرور

ومنورني

 

__________________
NO CoooMenT
S!Lent LoVe غير متواجد حالياً   رد مع اقتباس

 

قديم 17-02-2009, 10:23 PM   #7
kotam
عضو مخالف
 
تاريخ التسجيل: Feb 2009
المشاركات: 4
افتراضي

 

شكرا اخي واريد ان اضيف هدين البيتين من اغنية جزائرية في طابع الشعبي :
عالجيني بالملقى نرتاح من الشقى شعلت نار الفرقى طول الليل في الحريق
القلب صار في ديقة ودمعتي دافقة انوح من غير شفقة وحيد مالي رفيق

 

kotam غير متواجد حالياً   رد مع اقتباس

 

قديم 19-02-2009, 12:02 AM   #8
rookapop2005
عضو مزيكاوي
 
الصورة الرمزية rookapop2005
 
تاريخ التسجيل: Dec 2007
الدولة: مكان عمره 7000 سنه
العمر: 34
المشاركات: 301
إرسال رسالة عبر MSN إلى rookapop2005 إرسال رسالة عبر Yahoo إلى rookapop2005
افتراضي

 

ايه الجمال ده ياباشا الموضوع هايل انا كنت ناوي اكتبه علي المنتدي بس كنت مسافر وقولت اول مارجع هبقي اكتبه بس انت سبقتني هو انت شارح الموضوع كويس جدا وكل الكلام تقريبا مظبوط بس هو ناقص شويه حاجات صغيره وفيه حاجات عايزه تتشرح بطريقه اكبر انا هكتب اللي ناقص في موضوع ويبقي مكمل للموضوع الهايل بتاعك وبجد تسلم ايدك

 

__________________
منا لو حلمت الف مره
ولا مره هـ حلم إلا بيك

{ من غير كلام }انتظروني 15/7/2010
rookapop2005 غير متواجد حالياً   رد مع اقتباس

 

قديم 19-02-2009, 05:54 AM   #9
rookapop2005
عضو مزيكاوي
 
الصورة الرمزية rookapop2005
 
تاريخ التسجيل: Dec 2007
الدولة: مكان عمره 7000 سنه
العمر: 34
المشاركات: 301
إرسال رسالة عبر MSN إلى rookapop2005 إرسال رسالة عبر Yahoo إلى rookapop2005
افتراضي كيف تكتب الشعر الغنائي ( فن كتابه الاغنيه )

 

قبل اي حاجه انا بشكر silent love علي الموضوع الهايل اللي كاتبه وهو نفس الموضوع ده وموضوعي هيبقي مكمل لموضوعه والكلام اللي هشرحه دلوقتي مش من فهم شخصي هو من شبه دراسه من ناس فاهمه جدا وبجد انا مدين للناس دي لاني من غيرها مكنتش فهمت حاجات كتير جدا معلش انا طولت عليكوا بس يلا نبدأ الشرح

اول حاجه ايه هو الشعر الغنائي ده

بص ياسيدي الشعر الغنائي هو نوع من انواع الشعر بيتكتب باللغه العاميه الدارجه بين الناس في الكلام وهو فيه شبه كبير من الشعر العامي بس مش زي بعض وفيه فرق كبير بينهم اهمهم ان الشعر العامي مش مرتبط بقافيه يعني ممكن تلاقي بيت طالع في النص مالوش دعوه بأي قافيه في باقي الشعر وممكن تلاحظ ده من اشعار الشاعر الكبير احمد فؤاد نجم لانه من اميز الناس اللي موجوده في الشعر العامي

مكونات الاغنيه

زي ماقال سايلنت اي اغنيه في الدنيا بتتكون من 3 أجزاء
1- المذهب أو المقدمه
2- السنيوه أو(اللزمه زي مافي ناس مابتحب تقول عليه)
3- الكوبليه
ودول مش هشرحهم لان سايلنت شارحهم كويس جدا بس في ملحوظه صغيره جدا ان السنيوه حاول تكون جملك فيه قصيره ومشوقه وجايبه الفكره العامه بتاعت الاغنيه وحاجه كمان هو سايلنت قايل ان الاغنيه ممكن تكون من غير مذهب وان السنيوه بيقوم مقام المذهب في بعض الاغاني لا ياباشا هو العكس اللي ممكن يحصل ان المذهب هو اللي يقوم مقام السنيوه لان المذهب هو مقدمه الاغنيه او بالبلدي كده المدخل بتاعها ومفيش حاجه في الدنيا من غير مدخل فالمقدمه هيه الاساس والسنيوه ما هو الا جمله بتوصف الحاله العامه للاغنيه ولو المقدمه قامت بالدور ده مبيتحطش سنيوه علشان مايبقاش اسهاب او رغي وحشو كلام علي الفاضي وتكرار جمل والسلام

نيجي لاهم جزء في الموضوع كله وهو ازاي ابتدي اكتب الاغنيه

بص ياجميل اهم حاجه هي فكره الاغنيه ويمكن هي دي الحاجه اللي بتفرق بين اللي عنده موهبه بجد او اللي واخدها هوايه واحساسه كويس والسلام لازم قبل اي شىء تجمع فكره الاغنيه في دماغك وتسلسل احداثها ومش لازم بترتيب لان كل ده احنا لسه معملناش حاجه ومجرد ما جبت الفكره يبقي الموضوع بقي سهل جدا وطبعا حاول علي قد ماتقدر تكون الفكره بتاعتك جديده بس ده ممكن يبقي صعب شويه خصوصا لو واحد مبتديء بس علي الاقل يحاول يختار الفاظ جديده
ودلوقتي بعد ماجبنا الفكره نبتدي في الكتابه
احنا قولنا ان الاغنيه بتبدأ بالمقدمه ثم السنيوه ثم الكوبليهات
انا هقولك علي النمط التقليدي للاغنيه او زي مابيتقال للي عنده الموهبه بس لسه مبتدىء وبجد لو انت موهوب بس لسه مبتدىء استخدم النمط ده هيفيدك جدا
بص سيدي النمط ده بيعتمد علي قافيه واحده في الاغنيه كلها وهيه قافيه المذهب وبيترد ليها كل القافيات اللي بعد كده افهمك اكتر بمثال:

المقدمه:
ــــــــــــــــــــــــــــــ ( ر ) ــــــــــــــــــــــــــــــــــــ ( ب )
ــــــــــــــــــــــــــــــ ( ر ) ـــــــــــــــــــــــــــــــــــ ( ب )
السنيوه:
ــــــــــــــــــــــــــــــ ( ك ) ـــــــــــــــــــــــــــــــــــ ( ك )
ــــــــــــــــــــــــــــــ ( ك ) _____________ ( ب )
الكوبليه:
ــــــــــــــــــــــــــــــ ( م ) ـــــــــــــــــــــــــــــــــــ ( م )
ــــــــــــــــــــــــــــــ ( م ) ــــــــــــــــــــــــــــــــــ ( ب )

بص ياجميل الحرف اللي بين القوسين ده هو قافيه الشطر لاحظ كده معايا ان القافيه الاساسيه هنا بتاعه المذهب هيه حرف ال ( ب ) اللي هو اخر حرف بينهي البيت تعالي كده وبص علي السنيوه هتلاقي ان اول 3 شطور بقافيه واحده وده طبعا علشان يبقي فيه موسيقي السمع وهتلاقي اخر شطر بينتهي بنفس قافيه المذهب والكوبليه كذلك زيه بالظبط
والنمط ده الكتابه بيه قليله جدا بس بجد هو النمط اللي هيخليك تبتكر بعد كده وهديك مثال علي النمط ده في اغنيه عمرو دياب ريحه الحبايب ( بس خد بالك الاغنيه دي من غير سنيوه والمقدمه هنا قايمه بالدورين )

اي حاجه تيجي من ريحه الحبايب **** بطمن قلبي اللي مشغول علي غايب
كلمتين يتقالوا منه ولا عنه **** يطمن قلبي اللي مشغول علي غايب

لسه سامع كل كلمه قالها ليا **** لسه شايفه زي مايكون بين ايديا
اه ياشوق خليك بقي حنين عليا **** وريحلي قلبي اللي مشغول علي غايب

هنا هتلاقي القافيه الاساسه للمقدمه هيه حرف ال ( ب ) والكوبليهات ردت القافيه بتاعتها لنفس قافيه المذهب وده اسهل نمط تستخدمه في كتابه الاغنيه
وطبعا بالنسبه لانماط الاغاني مالهاش حصر لانها عباره عن ابتكارات من خيال المؤلف لكن فيه انماط ثابته وسهله واغلب المؤلفين الموجودين دلوقتي اللي هما تلت تربعهم سكه من وجه نظري بيستخدموا انماط ثابته مافيهاش اي ابتكاراقولك شويه منهم بالامثله زي اللي فوق بالظبط
نمط (1)
المقدمه:
ــــــــــــــــــــــــــ ( ي ) ـــــــــــــــــــــــــــ ( ك )
ــــــــــــــــــــــــــ ( ي ) __________ ( ك )
السنيوه:
ـــــــــــــــــــــــــ ( م ) ـــــــــــــــــــــــــ ( ا )
__________ ( م ) ـــــــــــــــــــــــــ ( ا )
الكوبليه:
ــــــــــــــــــــــــــ ( س ) _________ ( ر )
ــــــــــــــــــــــــــ ( س ) ــــــــــــــــــــــــ ( ر )
نمط (2) والنمط ده يمكن اكتر نمط مستخدم
المقدمه:
ــــــــــــــــــــــــــــ ( ه ) ـــــــــــــــــــــــــ ( ق )
__________ ( ه ) ـــــــــــــــــــــــــ ( ق )

السنيوه:
ــــــــــــــــــــــــ ( د ) ــــــــــــــــــــــــــــ ( د )
ـــــــــــــــــــــــ ( ش ) ـــــــــــــــــــــــــــــ ( د )

الكوبليه:
ـــــــــــــــــــــ ( بي ) ـــــــــــــــــــــــــــــ ( بي )
ـــــــــــــــــــــ ( م ) ـــــــــــــــــــــــــــ ( بي )

وحاول انت تبتكر انماط جديده وده اللي هيميزك يا بوب وطبعا القافيات دي كلها علي سبيل المثال

كده باقي حاجه واحده بس وهيه الوزن بتاع الاغنيه

بص ياقمر من الاخر الوزن بتاع اي اغنيه في الدنيا هووزن موسيقي بالسمع يعني مش بعدد الكلمات ولا الاحرف ولا الكلام الفاضي ده لان فيه اوقات هتلاقي حرف يوزن كلمه او كلمه توزن كلمتين علشان كده ماينفعش اجي واقول الشطر ده 4 كلمات واللي بعده 5 كلمات كده مش موزونين لا لان كده ده ميزان جبنه مش وزن اغنيه يعني مثلا عد كده عدد كلمات البيتين دول واحكم انت او دندن اي اغنيه تيجي في بالك وعد الكلام مش شرط انك تلاقي نفس عدد الكلمات وده بسبب ان العربي في حروف تقيله ممكن توزن حرف في السمع علشان كده في الغالب مش هتلاقي الاغنيه موزونه بعدد الكلمات لكن موزونه موسيقيا

الليلادي سبني اقول واحب فيك ***** وانسي كل الدنيا دي وغمض عنيك
ده انت نور حياتي عمري كل املي ***** شوق الدنيا مش كتير عليك
والله كل حاجه فيا بتناديلك ***** ايوه كل حاجه فيا بتناديك

نصيحه بقي مني اوعي تكتب حاجه انت مش حاسسها علشان تكتب وخلاص اكتب اللي تحسه وبس
اسمع اغاني كتير وحاول تحلل نمط كل اغنيه واستفاد منها ونصيحه تانيه اسمع ل ايمن بهجت قمر علشان ده موهوب بجد وبيخترع في التأليف

اسف لو كنت نسيت حاجه بس كده اظن ان بالموضوع ده ومعاه موضوع سايلنت يبقي كله تمام معاكوا ولو في اي سؤال او استفسار او اي جزء عايز تفهمه اكتر او تتعمق فيه اسألني فيه وانا عنيا الاتنين هرد عليك







 

__________________
منا لو حلمت الف مره
ولا مره هـ حلم إلا بيك

{ من غير كلام }انتظروني 15/7/2010
rookapop2005 غير متواجد حالياً   رد مع اقتباس

 

قديم 19-02-2009, 06:44 PM   #10
Pretty Eyes
عضو مزيكاوي
 
الصورة الرمزية Pretty Eyes
 
تاريخ التسجيل: Aug 2008
الدولة: منصراويه وافتخر
العمر: 28
المشاركات: 3,359
افتراضي

 

بجد شرح روعه وانا فعلا استفدت اوى
ميرسى جدا ليك
ويارب اقدر اخد بالى من الحاجات دى وانا بكتب

 

__________________


There is nothing i wouldn't do To hear your voice again
Sometimes i Want To Call You But i Know You Won't Be There
Some days I feel broke inside But I will not admit
Sometimes I just want to hide, cause it's you I miss
And it's so hard To say goodbye
When it comes to this
Pretty Eyes غير متواجد حالياً   رد مع اقتباس

 

إضافة رد

مواقع النشر (المفضلة)

الكلمات الدلالية (Tags)
>>, >>, موهوب, مكونات, الاغنيه, الشعر, العاميه, الغنائى, ادخل, ايه, بتتكتب, تعرف, تكتب, عايز, هنــــا, وازاي, كتابه, كيف

الشعر




أدوات الموضوع إبحث في الموضوع
إبحث في الموضوع:

البحث المتقدم
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع

المواضيع المتشابهه
الموضوع كاتب الموضوع المنتدى مشاركات آخر مشاركة
حـصـرى وبأنفراد تـام : الفيلم الغنائى الرائع Rock.On.2008.1CD.DVDRip.XviD~~ مترجم .::MiDo_StaR::. الأفلام الهندية المترجمة 17 04-11-2010 08:25 PM
جميع ألبومات النجم الكبير هاني شاكر من بداية مشواره الغنائي إلى النهاية في عام 2007 KôKô2010 ™ ألبومات الفنانين الكاملة 41 16-10-2007 10:49 PM
كتابه الحقوق علي الاغاني alekhandro007 قسم الارشادات و مساعدة الأعضاء 1 05-06-2007 03:29 AM

Rss  Rss 2.0  Html  Xml  Sitemap 


الساعة الآن 01:32 AM.


Powered by vBulletin® Copyright ©2000 - 2018, Jelsoft Enterprises Ltd. , Designed & TranZ By Almuhajir

Security & upgrade & support by LameyHost

Security team



 
 
Bookmark and Share

جميع المشاركات والمواضيع في منتدى لا تعبر عن رأي إدارته بل تمثل وجهة نظر كاتبها