[Student_Of_Liife]

الفيس بوك أول ما أنشأوه على النت ماكانش فيه الأوبشنز اللى موجودة دلوقتى دى كلها.. كان كبيرك تحطى صورة ليكى على البروفايل وحاجات تانية كدة بسيطة..

والفكرة منه إنك تتوقعى شخصية البنى آدم من صورته وطريقة ترتيبه لبروفايله! عشان كدة سموه الفيس بوك
عشان من مجرد صورة الشخص.. ممكن تعرفى شخصيته !

ف بالنسبة للبنات اللى بيحطوا صور ليهم بشكل غير أخلاقى وكدة والولاد كمان.. ف دول بيفضحوا نفسهم وكأنهم بيعرفوا الباقى إنهم هايفين و مش محترمين.. ف الهايف واللى مش محترم هيمشى وراهم وهيصاحبهم..
لكن المحترم العاقل هيبعد عنهم وهيقرف منهم!!
وزى مابيقولوا كدة الطيور على أشكالها تقع

و بقى الفيس بوك جزء لا يتجزأ من الإنترنت عموماً.. الإتنين فيهم الحلو وفيهم الوحش
يعنى لو ماكانش الفيس بوك موجود.. عادى جداً
المواقع الإباحية والبنات _اللى ربنا يهديهم_ ماليين النت واللى عايزهم هيدور عليهم وهيوصلهم!

ربنا سبحانه وتعالى خلقلنا الوحِش برضه زى ما خلقلنا الحلو.. عشان يبان الناس العاقلة اللى بتعرف الصح من الغلط واللى عارفة مصلحتها.. من الناس التانية الهايفة اللى شخصيتهم ضعيفة ووخداهم شهوات الدنيا ومضيعين مصلحتهم بإيديهم _ربنا يهديهم جميعا_

بس أنا ملاحظ إنك إتكلمتى عن سلبيات الفيس بوك بس.. لكن بالعكس هو ظهر فيه إيجابيات كتير حلوة..

وهى الجروبات الإسلامية اللى ظهرت فيه واللى ما شاء الله بينشروا معلومات دينية بيخلوا الواحد يعرف حاجات عن دينه ماكانش يعرفها..
وفى كل وقت للصلاة تلاقيهم يكتبوا فى الstatus للناس إنهم يقوموا يصلوا _أنا نفسى كانوا ياما بيفكرونى أقوم أصلى بال status بتاعتهم دى!_

فى برضه جروبات تانية زى حدث فى مثل هذا اليوم وجروبات الرياضة وجروبات الأخبار المحلية والأجنبية وحاجات تانية كتير حلوة

يعنى من الآخر معلومات وأخبار الواحد بيبقى نفسه يعرفها وبيلاقيها جاياله لحد عنده من غير ما يدور عليها!!

عشان ردى مايبقاش طويل بس.. ربنا يهدينا ويهدى الجميع ويثبتنا على الحق ويبعدنا عن شهوات الدنيا وعن هيافتها..

وشكراً ليكى على الموضوع